رباعياتي .. (متجدد)

[د. فريد ابراهيم]

طلب البراءة و إيده بـ الدم مغسولة
و فَصَّلوا عشان خاطره محكمة عمولة
وازاي يُحكم قاضيها بالعدل
و هو ف الأصل إيده مغلولة

--------------------

 

[د. فريد ابراهيم]

ما تقولش (بوتي) يا حبيبي ، إسمها (أصرية)
و اعدل لسانك ف الكلام، دي أمك مصرية
هو عشان تِبان نضيف تُخرج من جِلدك
ولا النمردة ع الأصل بقت موضة عصرية

ً--------------------------

 

[د. فريد ابراهيم]

دَعَكت المصباح و طِلِع لي عفريته كـ العادة
قال لي أطلب طلب و اتنين و تلاتة و زيادة
ما قِدِرش يحقق شيء من اللي اتمنيته
لما اتمنيت الحب و الصحة و السعادة

---------------------

 

[د. فريد ابراهيم]

فيه ناس تعيش حياتها و تموت وهي بـ تدوَّر ع الحب
و ناس يدوَّر هو عليها و ما يلاقيش جواها قلب
غريب امر الهوا، لا فرحه يعرف يجيبه ساحر
و لا جرحه له دوا في الطب

--------------------------

 

[د. فريد ابراهيم]

بـ يمَصمَص ف عضمة معَصعَصَة
ما نابوش غير المَصمَصَة
ما شبعشِ بس حمد ربه
على عياله الكويسة


-----------------

 

[د. فريد ابراهيم]

مرض الوطن لا له دوا و لا مُسَكِن ..
ما هو جرح الفساد مهما داويته ح يعفن ..
و كل مُخلص للوطن ح يموت شهيد
و مش ح يطول حتى ف عَلَمه يتكفن ..

----------------------------

 

[د. فريد ابراهيم]

مش ح أظلم معايا الشيطان , انا لوحدي اللي جاني
مش ح اكدب و اقول أصله حط الكدبة علي لساني
الشيطان شمّاعة خايبة بنعَلَّق عليها اخطاءنا
و كل أخطاء البشر أصلها إنساني ..

--------------------------

 

[سلسبيل]

اللهجة جميلة
أبدعت

متابعة