رباعياتي .. (متجدد)

[د. فريد ابراهيم]

عامية مصرية


ربوا له دقنه و فخخوا وسطه بحزام ناسف
و غسلوا دماغه و وسخوها بكلام جايف
وراح يفجر نفسه و يستشهد ف سبيل ربه
و ربه ازاي يحاسبه بجد انا مش عارف

---------------

تعرف الخاين من عينه اصلها فاضحاه
يستحمروه العدا و يقولوا له (شي و حا)
و يبيع لهم ارضه و عرضه
و ربه لو يسامحه ارضه مش مسامحاه

---------------

فقري وعايش بحلم ب كيس لحمة
استناها ف العيد و تجيلي ب الرحمة
و توحشني بعده ف انزل اجيب كرشة
تطلع لي ف الكرشة تلاتين تلاف عضمة

---------------------

الاسم شاعر ولا ليا كتاب ولا ديوان ولا قصيدة
واسمي لا زار شاشة ولا راديو ولا جريدة
احنا شعب يحب يهول الاشياء
يرفع ناس ل فوق و ينزل ناس ع الحديدة


--------------------

 

[سيرين]

الرباعيات نوع من الشعر له باع ومذاق محبوب
ومعبر صوغا وعمقا ببلاغة وجزالة الكلمة
سلمت يمناك د \ فريد
سأكون هنا متابعة او مشاركة لهذا الجمال
مودتي والياسمين

\..

 

[رشا عرابي]

د/ فريد
تأتي بالدّهشات من مكمن ضوئِها
وتُجندِلُها في لبّ السطر

بالقرب سأكون
إيماءة واقتناص وقد تستفزّني اللّهجة الحبيبة ببعض سطر مُرتجل

 

[د. فريد ابراهيم]

الزميلة العزيزة سيرين

الرباعيات نوع من الشعر له باع ومذاق محبوب
ومعبر صوغا وعمقا ببلاغة وجزالة الكلمة
سلمت يمناك د \ فريد
سأكون هنا متابعة او مشاركة لهذا الجمال
مودتي والياسمين

اتمني ان يوفقني الله ولا أفسد تاريخ الرباعيات ههههه
و تشرفني دوما متابعتك و تزيدني شرف مشاركتك
عيدك سعيد
و دمتي بكل خير

 

[د. فريد ابراهيم]

الزميلة العزيزة رشا

د/ فريد
تأتي بالدّهشات من مكمن ضوئِها
وتُجندِلُها في لبّ السطر

بالقرب سأكون
إيماءة واقتناص وقد تستفزّني اللّهجة الحبيبة ببعض سطر مُرتجل

تخجليني دوما بكرمك الوافر و لا أجد ما يرد جميل هذا الثناء
يسعدني و يشرفني مرورك في كل وقت
جل التحايا و كل الود

 

[د. فريد ابراهيم]

قال لي السياسة شغلانة صعبة و مشكلاتنا معقربة
بنزين وغاز و علام و صحة دا كله غير الكهربة
وشاف ف عيني سؤال شاغلني.. ازاي نحل دا كله يعني؟
قال بالحنان و الطبطبة!!

--------------------

قلبي ماشي ب يتمرجح شمال و يمين علي حبل سلك
بين إني ابوح لك أو أخبي ك بهلوان لاعب ف سيرك
و اخاف اقول لك بعشقك ما تصدقيش
و اخاف اقول انا بعبدك ل يبقى شرك

-------------------

ساعات ب احلم ب بكرة ييجي ب حرية فيها نعيش
ييجي ب بسمة تمسح عينيا و من بعدها ما تبكيش
لكن قلبي من كتر ما شاف.. ساعات انا من بكرة بخاف
و اتمنى بكرة دا ما يجيش

-----------------------

قام الصبي و انتفض و رمى الحجارة ع الجبان
ما هو شاف بلاده ب تغتصب كل يوم و دا من زمان
قتلوه الصهاينة ف حضن ابوه
صدق اللي قال مش كل بني ادم انسان

------------------------

 

[د. فريد ابراهيم]

حبيبك لو يوم وصل خلي حنانك يوصل له
و لو مهما بينكم حصل ما تخلي اللي صابك يحصل له
و خد منه كل حنانه واديله ضي عينيك
ولو كان حبيبك عسل خلص عليه كله

----------------------

كل واحد له ميزاته بس برضو فيه عيوب
و مهما كانت حسناته برضو ب يرتكب ذنوب
يبقى ما ندورش على ملاك نعاشره
و احنا بني ادمين يا دوب

-----------------------

قالوا ماحدش بيموت لو حبيبه سابه
و حبيبي بعد ما فاتني فات قلبي ف عذابه
صحيح انا عايش بس شيء جوايا مات
و قلبي بس عايش على ذكرى اللي غابوا

-----------------------

الفقر مش عيب العيب فقر النفوس
و الغنى مش ف الجيب ولا كام عندك فلوس
الغنى ف القناعة دي القناعة كنز
ما يجيبوش مارد ف قمقم ولا عفريت ترك الفانوس


-----------------------

 

[د. فريد ابراهيم]

لو انت واخوك على ابن عمك تبقى قلة اصل و ندالة
و لو انت و ابن عمك ع الغريب يبقى انتو مش رجالة
خليك حقاني و محايد من غير تحيز
خلي كلمة الحق هي اللي متقالة

--------------------------

جبت دفتر و قلت اكتب فيه مذكراتي
اكتب كل حاجة بتحصل ف حياتي يوماتي
اول ما قلمي لمس الورق كتب: ليه
عايز تخلد الماضي و تهجر الآتي

----------------------------

الدنيا ساعات ح تمشي معاك و ساعات ح تبقى معصلجة
ساعات ح تلقى الوانها حزايني و ساعات ح تبقى مبهرجة
ف لما تبكي افتكر الضحكة
و زي ما جت ايام حزينة ح تيجي ايام مبهجة