أجمل \ أصدق مرثية قرأتها للمشرق المسفر مسفر الدوسري

[عبدالعزيز رشيد]

لبياض قلوبكم
هذا البياض الناصع بالاحزان ..

.
.

يبـه شلـونك...؟؟؟
**
يبه شلونك...؟؟ملل هالــكــون من دونك ..
يبه شلونك ؟؟وتمضي رحلة الدنيا..
بليا طلة عيونك..؟؟!!
يبه شلونك ؟؟وشلون المرض وياك ؟؟
بعد ماهدك بدنياك..عساها تغمض جفونك ؟؟
تبي تدري عن أحبابك ؟؟عن عيون تغنى بك ؟؟عن قلوب دفنها الشوق..وإذا جاها الغفا جابك ؟؟
.. يبه أمي تخيلك دوم...تغني لك مع القمرا..
يبه واللي خذاك بيوم....خذا بنيتك بكرا..
خذا.. وياماخذا.. ويا ما..خذا ناس يحبونك
يبه حنا صرنا كبار..توفقنا وتخرجنا..
يبه معاد فيه صغار..يموج بها الزمن كل شي..
وحنا ماتموجنا..على ذاك العهد نسري..
نبيع العمر والدنيا..ولا تخلف بنا ظنونك
يبه شلونك ؟؟تبي تدري عن إخباري ؟؟
عن أفكاري وتذكاري ؟؟
أشيلك داخلي جمره ..وبعيون الحزن عبره..تغرقني .. وتحرقني..
أشوفك نجمة تجبر..مراعيها .. يراعيها..
وأشوفك للرجولة اسم..إذا شد الزمن تقسى..واحلم من معاني الحلم..أحسك مقبل بكرى..وعيا لايجي بكرى !!
يبه تذكر زمان مر؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لأجل هذا ..
وكل هذا ..
أقول اليوم يايبــه ..
ملــــــــــــــل هالكون من دونك
يبه وينك ؟؟ .... ولهت لنظره من عينك ....
يبه وينك ؟؟
أشوفه طوّل غيابك !! ... و من ودّاك .... ما جابك !!
قالوا ما يدوم الزين !! ... و أنا عندي أمل للحين ..
و لكني أعرفك وين !!
يبه وينك ؟؟
عسى الداعي يبه بس خير ؟!!
عساك بخير .... مداين تكرم لعينك ...
بس أرجوك علمني ...
علمني .. يبه وينك ؟؟
سألت أمي عن رجوعك ... ولا كني أعرفك وين !!
و قالت .. ما يدوم الزين !! ... و أنا .. عندي أمل للحين ..
في رجوعك !! .... يبه بس تكفى علمني ....
متى رجوعك ؟؟ .... يبه بس تكفى علمني .
وش أحلى من طلوع اثنين ؟؟
طلوع الشمس .... و طلوعك
يبه وينك ؟؟
سألت أمي ...... غيابك طال ؟؟
ولا كنّي أعرفك وين !!
و قالت مثل ما قالت .. حسافه ...
ما يدوم الزين ... مع كل هذا صدقني .. أنا عندي أمل للحين !!
سؤالي عنك يالوالد .. صار كما الموال
و أشوفه طال ... والله طال ..
حزين .. بلحنه و حروفه ... يخاف .. يموت من خوفه ... و قلب ٍ كان أقوى قلب ... ضعف .. من قسوة ظروفه ..
يبه ..
أرجوك علمني ...
تشوف اللي أنا أشوفه ؟؟
أنا أشوفك نهار و ليل ...
في وسط المجلس تصلي .. و تدعي الرب ييسر لي ..
يبه ..
ما عاد بي من حيل .. وين الحيل ؟؟
و أنا أشوفك نهار و ليل .. مع إني ادري ما ترجع !!
غريبة .. بعدها تدمع .. عيوني من هموم البين !! .... و ادري به مكانك وين !! ... مع َ هذا .. أرد و اسأل !!
يبه .... وينك ؟؟
و لا كني أعرفك وين !! شبكت العشر في غيابك ... على رأسٍ ٍ كساه الشيب .. و من وداك ... ما حابك ..
و لا ادري وش يخبي الغيب !! ... و جرح ٍ عذّب أحبابك .... يبه ..عيّا يخف و يطيب !!
يبه.. كل جرح في الدنيا .. مصيره بالدوا يلتئم ... و لكن البلا من جرح ..
نزف فرقاك ... بليّا دم !! ... و هذا الفرق في جرحي ... عجز يلقى الدوا دكتور .. أنا جرحي غريب الطور !!!
ينزف ... بس بليّا دم .. و زاد الهم فوق الهم ... و دام انك يبه غايب ... جروح الغيبة ما
تـلتم ..
بس عندي أمل للحين !! ... و لا كنّي أعرفك وين !!
يبه .. ذكراك تفرحني ....
في نفس الوقت تجرحني !! ... لا من جبت في طاريك ... دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس .. كل ٍ كان في بيتك ضيف ..
آلا يا حيف .... آلا يا حيف ..
زمن قاسي .. زمن قاسي ...
اخذ مني بلا رحمه ... اخذ مني اعز ناسي !!
و خلاّ لي سهر هالليل .. في عيني ضيف .. إلا يا حيف !!
يبه وينك ؟؟
تعال و شوف ...
كبرنا مثل ما تمنيت ... درسنا كل ما حبيت .. نصلي مثل ما وصيت.. و ندعيلك في كل الظروف ..
يبه وينك ؟؟
تعال و شوف .. صحيح الدنيا ما ترحم ..
تجرعنا التعب أنواع ... و لكن الأمل ما ضاع ..
و أنا عندي أمل للحين !! ... و لا كني أعرفك وين !!
يبه تذكر شطا نتنا ؟؟
أنا و اخواني و خواتي ... معانا عيال حارتنا ..
نلعب في زوايا البيت .. يبه ... والله أنا حنيت ..
لذاك الوقت في وجودك ... ألا يا ريت ... ألا يا ريت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ... خذتك بعيد .. و خلتنا !!!
يبه أمي تذّكرنا ... بأيامك قبل ما تروح ... تناديها.. يا روح الروح..
تغازلها و تنظر لك .. مثل طفله ... ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. أو بعد منها ... كنا نغار
نحبك يا يبه ... ارجع .. مثل شمس الفجر .. اطلع
حزينة الشمس في غيابك .. و نفس الحزن في أحبابك .. وأخاف الشمس من حزني ..
تغيب و ما بعد تطلع !! .. يبه ارجع !! ... اذا لي خاطر فـ قلبك ..
تعال و زورنا بس يوم... مع انه ما يكفينا.. نشوفك يوم.. نبي حضنك يدفينا .. و نشوفك دوم..
لكن قلّت الحيله ... و يمكن مـ البطا ضاعت ..
و قلنا يوم !!
يبه سامحني بترخّص ... قبل ينشف حبر الأقلام.. كلامي بعده ما خلّص..
و لكن موعد الأحلام .. حان ..
ولازم أوفي له.. بعد ما ضاعت الحيله .. أشوفك والوعد باكر !!
إذا فكّر يحي باكر..!! .. و برجع أسألك وينك !!
بس لازم تجاوبني.. ترى عندي أمل للحين !! .. و لا كني أعرفك وين..!!
يبه شلونك ؟
ملل هالكون من دونك
يبه شلونك ؟
وتمضي رحلة الدنيا ... بليا طلة عيونك
لأجل هذا ... وكل هذا ... أقول اليوم يابـوي
ملل هالكون من دونـــــــــــــــــــــــــك.....!!

.
.
.

هذا الرجل جعلني
أتجرّأ على القول بأنه أفضل من يكتب التفعيليّه
حسبي الله عليه

 

[تركي الحربي]

الغالي عبدالعزيز


قرأت أوّل النّصْ ، فــ أغلقت عيناي عن بقيّتُهْ


هو حزن ٌ لم يَمُتْ ولكنه يتجدد بي !


شكرا ً لك

 

[نور]

عبدالعزيز ,,


دائما يعجبني ما يكتبه الشاعر مسفر الدوسري ,,


وهذه القصيده فاقت كل المقاييس الجماليه ,,



الله يسامحك ,,


ابكيتني ..



كل التقدير لك على هذا الاختيار الرائع ,,


وياليت يتواجد بينا الشاعر مسفر الدوسري ,,



اعطر الأماني,,



نور...

 

[بعد الليل]

لـــ .. مَشَاعِرِه
و
لــ .. شِعرِه



الشكر الكبير
لــ .. عبدالعزيز رشيد
على الاختيار الراقي

تحياتي

 

[عبدالعزيز رشيد]

المشاركة الأصلية كتبت بواسطة تركي الحربي

الغالي عبدالعزيز


قرأت أوّل النّصْ ، فــ أغلقت عيناي عن بقيّتُهْ


هو حزن ٌ لم يَمُتْ ولكنه يتجدد بي !


شكرا ً لك

أخي
الكريم \ تركي الحربي
اعرف تمام بأن قراءة هذا النصّ مغامرة خطيرة
لاتكاد آهاتنا تحتوي الحزن بهذا النصّ
ألف تحيّة لك

 

[عبدالعزيز رشيد]

المشاركة الأصلية كتبت بواسطة نور

عبدالعزيز ,,


دائما يعجبني ما يكتبه الشاعر مسفر الدوسري ,,


وهذه القصيده فاقت كل المقاييس الجماليه ,,



الله يسامحك ,,


ابكيتني ..



كل التقدير لك على هذا الاختيار الرائع ,,


وياليت يتواجد بينا الشاعر مسفر الدوسري ,,



اعطر الأماني,,



نور...

نور
اختاه ..!
كلّ أسفي لدموعك
وكل شكري لبياض حضورك
كيف لايعجبنا مثل مسفر ؟
وهو يكتب الشعر بحبر الاحساس .. الاحساس لاغير الاحساس ..,

 

[عبدالعزيز رشيد]

المشاركة الأصلية كتبت بواسطة بعد الليل

لـــ .. مَشَاعِرِه
و
لــ .. شِعرِه



الشكر الكبير
لــ .. عبدالعزيز رشيد
على الاختيار الراقي

تحياتي

اختي
بعد الليل
ونحن من عندنا كل الورود لـ حضورك الجميل
بحقّ مشاعر لايكتبها الا قلبٌ :102:
كلّ الشكر لـ شكرك

 

[عبدالعزيز رشيد]

اخواني
اعرف بأن بعض الخطأ الغير مقصود ذنب قد لايغتفر
خصوصا بحق الجمال وخصوصا بحق الجمال الآخر مسفر
قصيدته الرثائيه بعد ان سمعت بضع مقاطع منها من احدهم
انطلقت الىالعم قوقل كي استحوذ على ماتبقّى منها فوجدت هذه في لأكثر من مكان وأماكن تعرفونها جيدا
ومنسووبه للمسفر مسفر
ولولا احدهم بهذا المنتدى الذي ابلغني عن الامر وقال بأن مسفر نفسه قال بان النصّ لأحد جاراه
لما تنبأت لذلك الا متأخرا


وهذا هو النصّ الأصلي




يُبَه شْلونك ؟!
عَسَاك طيّْب ؟!
عساه أَخْضر عليك قَبْرك ؟!
يا أَكْبَر مِن رَأَت عيني ..
عسى قَبْرِك رَحَمْ كُبْرِكْ ؟!
يُبَه شْلُونك ؟!
شْلون " الرُّوماتِزِم " ويَّاك ؟!
كِنْت تْسِبّه في دنياك
كنت تقول :
" يبيني هاللعين أَبْرِكْ "
تطِقّ رجلينك بْقوَّه
تعِضّْ .. الطَّرَفْ مِن ششفِّتِكْ ..
وتقول : " لا والله ..
في زُود الشِّقا جَبْرِك " !!
يا ألله .. !!
تَعَبْت كْثير في هالدنيا
وصُبَرْت كْثير ..
عسى الله عوّضَكْ صَبْرِك ؟!
يُبَه شْلونك ؟!
عَسَاك بْخير ؟!
ياللي كِنْت مِتْأَكِّدْ ..
إن باكر ..
بيجي في يوم مِتْزَيِّنْ !
وياللي كِنْت ..
قاسي حيل واحْنَيَّن ..
وكان دايم
ورا جَمْر الغَضَب مِنَّكْ
مطر بقْليبك امْبَيَّنْ ..
وكِنّا نَدْري ذاك الوقت ..
حِمْلِكء صَعْب
صَعْب وايد
وما كان ظَهْرِك الّليَن
يومياً ..
كِنْت تِصْحّي فَجْر الله ..
تاكل بالعَجَلْ لقمه ..
تشْرب شاي ..
تروح طالع ..
وتظلّ تِكْدَح طوال اليوم ..
وبالآخر ..
ترِدّ فـ العاده مِتْدَيّنْ !!
حِمْلِك كان صَعْب وايد
عساه بْقَبْرك الْهَيّن ؟!
عسى بْقَبْرك .. صارت أحسن الأحوال ؟!
وعسى قَبْرك عليك واسع ؟!
كنت دايم تشكي من :
ضيْق الحال ..
وضيْق الفَال ..
وضيْق البيت ..
وضيْق الشَّارع اللي يوَدّي لْبيتنا ..
والبال !
وكِنْت تْسُولف بْغَصّه
عن اللي يعْتِصِر هالنّاس
من ضيم وتَعَب .. وأطفال
وكنت تقول :
" دام أن السُّوالف مُرَّه مِثْل الهيْل ..
ليش ماتسْتوي بـ "دلال" ؟!
ليش ما " نِجْرَها " مَسْموع - مثل الهيل –
يحَرِّك نَخْوَة الرّجَال ؟! "

كِنّا نِمْتلي دَهْشَه
ونِتْفَاجأ مِن السؤال !
وبَعَد ما تْرُوح ..
كِنّا نشْرَب الباقي مِن كلْمَاتِك المُرَّه ..
واللي كنت تتْركها ..
دوم بْقَاعة الفِنجال !

يبَه مشتاقلك وايد ..
يُبَه شلونك ..
ليما الْحيْن تِحِبّ السّامري بالحيْل ؟
وتْشيله ..
وصوتك يمتِزِج بالليل ..
ويَضْوي صُوتِك ويَضْوي الحِزِن فيك ..
ويصير قنديل ؟!
ليما الْحيْن تحِبّ السَّامري بالحيْل ؟!
أَتْذَكَّرْ ..
كِنْت تْقول وإِنْت تمَوِّل مَعَ اللاّ.. لا.. :
" حَمّْ الطَّار "
" عشان صوتك مع اللاَّ .. لا..
يشِدّْ .. ويِسْتِوي مَنديل "
وكنت تقول :
" إخْتَرْ صَفّْ من الصَّفيْن ..
شِدّ أيديك بيْديْهم ..
تمَثّْلْهُم ..
ذَوْب فيهم ..
تحِسّْ " باللاّ لا " مِن تطْلَع ..
من صِدْق الحَنَاجِر .. سيْل " ؟!
بَه شْلونك ؟!
بَعْدِك من يحَمَّي الطَّار ؟
يشْعِل فـ الدِّجى اللاّ لا ..
ويحِبّ السّامري بالحْيل ؟!

مسفر الدوسري


___________


النصّ بالموضوع ليس لمسفر هذا اسقطه الآن
لكن لاأسقط كلامي بشأن ان النصّ اروع نصّ رثائي قرأته
حسبي الله عليييك يامسفر حتى اللي يجارونك يبدعووون !!



أكرر أعتذااري
الذي لايغتفر