ظاهر الوقت يضحك والزمن فك بابه - وانت خوفك من الضحكه وراها مصيبه / بداح الشويّب

[بداح المطيري]

ليت الاحلام سهله ، والاماني رحابه
وليت الايام رغبه ، والزمن يستجيبه

وليت بعض الطواري ماتجيب الكئابه
والليالي ماراحت به ، ، تعوّد تجيبه .

يا وجودي وجود اللي تذكر شبابه ،،
يصبغ الشيب ماوده يشوفون شيبه

( شاف وقته تغيّر والليالي نها به )
يحسب ان السنين اللي ذكرها قريبه

وياوجودي وجود اللي يفضل غيابه
يسبق الناس طيبه عقبها ضاع طيبه

عنده الناس مثله والطبايع تشابه ،
لين شاف الاوادم كل واحد وعيبه ..

اتوجد من اللي ما حسبنا حسابه ،،
ولو حسبنا حسابه صار ( والله حسيبه )

من سؤالٍ يحيّر ' حار حتى جوابه ،
يبتدي به سؤال وما عرّف ينتهي به

ليه في هالزمن رد الجمايل اطلابه
واغلب الناس صارت بالتعامل غريبه

ويا حياة الشقى لا بيّن الوقت نابه
يختلط مبسمك ما بين فرحه وريبه

ظاهر الوقت يضحك والزمن فك بابه
وانت خوفك من الضحكه وراها مصيبه