مــزح وشـويـَّة مـشـاريــه

[سلطان الوثر]

,




يابوعلي* .. بالله قاطعتني ليه ؟
والله مالي بالحليب السعودي !

نوبه شربته .. بس لعيون شاريه
ماكنت احسب انّه صناعة يهودي

ما اعرف غير الببسي الله يخلّيه
لاصار قرص الشمس وضعه عمودي

السالفة مزح وشويَّة مشاريه
تصادمت واستبرقي يارعودي

ذكرتك وقام القلم عن قوافيه
على الورق حبره يلطّخ زنودي

والشاعر اللي مابرد غير شاهيه
ياصل مواصيل الأسد فوق جودي

العمر : مقفي واجرد الروح مهديه
شرواك , ماتاقف بوجهي حدودي

يمكن ترجّتني على قدرتي ( إيه )
لكنّ ماقدرت تجمرك جهودي

العشق كلّه باح .. مُرّه وحاليه
لا احدن يحاسبني على اغلظ عهودي

طالت وانا في خمرة الحب اناديه
لاميْت يسمعني .. ولا حي نُودي

أضحك على اطلاله ليا جيت باكيه
وابكي على ضحكات باقي ورودي

الله يقطع طاري يجيب طاريه
والله يهديني واوفّي وعودي

دام الهقاوي طيّبه مثل ماهيه
يابوعلي برِّح عن البِـيض سودي

دام البسيط يحيله (المصطفى بيه)
وانا على الجبهه معشِّم جنودي

فرض العصر بالقدس ودّي أصليه
بسَّ الحيا اللي ما انقطع من قيودي

وانت الذي بالطيب فارض معاليه
حايف مداخلها وشايف ركودي

الوقت ماهو بـيْدي ان صرت بيديه
والارض ماحسَّت بنقصي وزودي

والروح: انا .. والجسم : بس انولد فيه
والعمر: (لحظة) دااايم آقول عودي


,













ــــــــــــــــــــــــــــــــــــــــــــــــــ ــــــــــــــــــــ
* أبو علي : أخوي الكبير/ عبدالله مناحي منقرة البلوي












.