[مـدرسة الـدنيا ]: النص محذوف لأسباب مؤنثة !

[حنين عمر]

[مـدرسة الـدنيا ]: النص محذوف لأسباب مؤنثة !

[ محذوف نصِك / محذوف صوتِك/ محذوف حلمِك ]

كل شي محذوفْ من نون النِسا إلا الأسى
وكل نصٍ نكتبه ويطلع حلو / لازم ورا حبره "رجل" أو "أبلسه"
وكل شيْ "طيبْ" نقوله يعني إنه يا كذب يا "وسوسه"
وكل جملة تريد تكبر من شـِعرنا / يعلموها شلون تسكت / تصحى بدري / تروح صف المدرسه...!
[ما اريد أروح المدرسة ...]


حرة أنا / بكيفي أنا / وما همنّي لو نختلفْ...
ما نعلّم العين البكا / ولا نعلّم الجرح النزف ...
ما نعلّم الـ [ الأو تو o2 ] طريقه للصدر ...
هذا الصدر ...
ما نعلّمه شلون الهوا يتنفسه.
بس للأمانة : أعترفْ...
بعض القصايد من ذهب / بعض القصايد مُفـْلِسه!
وبعض الكتابة من السحر / والبعض حبر و هلوسة
واحنا بزمنّا للاسفْ / النقد ميزانه اختلف.
لكنما يبقى الصدق مثل الشمس...
والشمس لمّا ترتفع فوق العتم / ما نلِمها بالمكنسة .

[ما اريد أروح المدرسة ...]

حرة أنا / ما همنّي...
خل أنقتلْ يا ها الزمن...
ولو على نحري تحطّ السيف مغموس بشجن/ وتغطي أيامي بكفنْ
أضحك أنا وما انحني :
حرّ الصقر ما ينسجن...
دمي عزيز وبيرقي عالي إذا عزم النشامى ينشحنْ /
ما كو هزيمه تـِنـْكِـسَه / ونبض القلب ما نِحبـِسهْ...
والفرع يرجع للأصولْ
دربي بعيد بلا وصولْ
وآني مسافاتي بحر / ضيّعتْ فيها مركبي / لاهـُو غرق ...لا هـُو رسى

[ما اريد أروح المدرسة ...]

حرة أنا / وعزمي حديد / ما أقدر أصير من العبيد
وأعصاب مخي مربعّه...
ما أقدرأصير بلا وجه / مالي ملامح واضحه / مثل الجميع مقنعّه...
وملونة ومنوّرة ...
مثل الدمى في كرنفال المسخرة
ما أريد أخالط زحمة أسواق الشّعر: [ واسمي يباع و يُشترى ]
وما أريد شهرة مزوّرة / ولا أريد موتة مكرّرة ...
ونفسي أظلّ:
[وحدي أنا وفنجان شايي وسكّره /
وقلب ٍ تذكر ما نسى.../ ودمع ٍ قسِيتْ وما قسى...]
والدّنيا أكبر مدرسه !
حنين عمر//