:
(( لا تــــعــــتـــــذر ))
من عيون الشعر التقليدي
الشاعر : زايد بن علي المري
لاتعتذر مـال الهجـر منـك تبريـر
صـدك بليـا ذنــب والله ظليـمـه
"
ماصارلي بعدك يفـوق اي تصويـر
تجـددت كـل الجـروح القديـمـه
"
بعـدك لعبـي هاجسـي والتفاكيـر
وقلب ٍ جريح وروح صب ٍ مهيمه
"
ماغير اسلـي خاطـري بالمشاويـر
اروح وارجـع والهواجـس مقيمـه
"
ياحبي اللـي بيـن بيـض الغناديـر
لك في عروش القلـب قـدر ٍ وقيمـه
"
ان كان صدك ماخـذك عنـي لغيـر
روّح ولـو ان الخسايـر وخيـمـه
"
وان كانهـا عنـي خذتـك المقاديـر
فالعفـو عنـد المقـدره فيـه شيمـه
"
يامرحبـا والحـب كلـه معـاذيـر
تشفـع لـك ايـام الغـرام القديمـه
"
يوم الهوى لازارني منـك أعصيـر
أضم في صدري من اجلـك نسيمـه
"
واليوم اصبر خاطر الوجـد تصبيـر
واقول صدك عقب وصلـك جريمـه
"
ولاجاك مني ياهوى البـال تقصيـر
مواقـفـي ويــاك والله عظيـمـه
"
صخرت لك مشاعر الشوق تصخيـر
وامطرتـك بحبـن تقـفـاه ديـمـه
"
وظللتك بجفنـي وصـارت مسافيـر
يـوم الغـلا بيـن النديـم ونديـمـه
"
واليـوم ماتنفـع كثيـر المحـاذيـر
تفاغمـت بيـن النفـوس الحشيمـه
"
عسى سنينك روض عشب ونواويـر
محـد لنفسـه يرتضـي بالهزيـمـه
"
اما تخاويني علـى الشـر والخيـر
والا السلامـه منـك راس الغنيمـه
آخر المشاركات
04-25-2009, 01:25 AM
العرض الشجري