نفسي عليك اتخاف يوم الخوف قايد كل ضيق
والنفس عبادة لمن تهوى وقلبي قد هوى
ذات الرموش اللي عليها الليل الاسود يستفيق
ذات العويد اللي على عود الرياحين انطوى
واحسامها خشم ن يسد النور من زود البريق
حده لو أنه يضرب الفولاذ تلقاه انعوى
قسامة ارزاق الزهر بين الخمايل و الرحيق
سقاية انهار الحلا منها ثرى الزين إرتوى
ما كنت أشعر بالحرارة لو تولاني حريق
لكن لما شب ناظرها حشى القلب إكتوى
يارب أنا ناوي أقبل رجلها وأسلك طريق
رمش العيون اللي سلك غاباتها يوما غوى
وآنا نويت ولا نوى قلبي تعدى ما يعيق
للي نوى يأخذ فوادي ثم تحقق ما نوى
والخبز أحلى لكن القيمر على الكف الرقيق
أحلى من الطاووق لو لحمه على النار استوى
تهجرني الدنيا اذا غابت وما يبقى صديق
واتشوف حزني حط أيده فوق خده وإنزوى
وآنا بصراحة من هواة الغيد والجسم الرشيق
والخصر لامنه تمايل حول قلبي والتوى
لكن لو كل العذارى تهتويني ما أطيق
غيرك ولا أعشق سوى زينك ولا أعشق سوى
غرنوق طرفه ناعس اليا نام لحظة يستفيق
أقوى النواعس بس رمش العين قلبي ما قوى
البعض معشوقه جميل وظاهره جدا أنيق
لكن جوز الهند ما ينذاق لولا المحتوى
وانتي محار القلب والأصداف في البحر العميق
لو تنفلق تلقى درر ما بان باطنها خوى
والزين في الأخلاق و الأطباع والأصل العريق
والليل ماهو ليل يغدي ليل لو ذيبه عوى
واللي غرق في بحر عينك ما يسمونه غريق
يمكن يسمونه نجم من ليل شلالك هوى
في غيبتك آزور طيفك في زفيري والشهيق
يالين اتنفس خيالك في المحاني والجوى
عندك حواجب كنها صقر ن على العليا طليق
لا يقبضه من ماعرف صقر الصقاقير وشوى
ياقصة الوجدان يا الوجدان بالوصف الدقيق
انتي حكايات المحاسن والجمال اللي روى
لك مستوى بالحسن راقي بس بفتونك يليق
حتى القمر مهما ضوى ماهو بذاك المستوى
والله رب الكون والمسطور والبيت العتيق
محد يساوي طلتك واللي على العرش استوى
آخر المشاركات
11-22-2017, 10:15 AM
محّد يساوي طلّتك!
العرض الشجري