أعترف إني حروف .... مبعثرة
أعترف إنك كفوف .... وأسورة
كفي لمست مره يديك
من يومها قلبي يبيك
ويعترف إن النبض ... فيه اختلف
ما هو النبض .. زاد وركض
عدا حكايات السنين
مر القصور ... والجسور
وبيوت طين
أعترف
إني وأنا أعترف
مدري كلامي ... هو كلامي ؟
مدري الحروف مين اللي سكنها ... الورق
مدري العيون مين اللي كحلها ... الأرق
مدري القلوب كيف ... تنسرق
كيف الليالي باردة
وجمرة غضا في داخلي ... تحترق
أعترف
إني سراب
ما لقي من يتبعه ... ويتبع سراب
فـ كفي ضما ... فـ عيني ضما
وبين الصحاري والسما
يبست عروقي من الجفاف
دمعي بدا مثلي ... يخاف
وكفي تخاف
وقلبي يخاف
يشرب من الرمضا .... الضما
أعترف
إني عذاب
ما لقي من يحضنه ... ويحضن عذاب
وسط الرياح ... برد وهجير
نزف الجراح ... عمر الأسير
يا مركب الدمع الكثير
غرقتني في ليلٍ ... نسى وقت الصباح
أعترف
إني أماني من قلم
تكتب على جدار الحلم
لحظة أمل
أعترف
إني بدايات الهبوب
وإني نهايات الغروب
واللي حصل .... شمعة فظلام
مره أوقدت ... ثم انطفت
وضاع الظلام ... وسط الظلام
وسكت الكلام
وبان في عيوني اعتراف
إني أخاف
أكتب ورى ليل ... وظلام
آخر المشاركات
11-30-2010, 02:09 AM
اعتـــــــــــــرافـــــــــات
العرض الشجري