مساء الخير
نص قديم يجدد إحساسه بينكم .!
[poem=font=",6,black,normal,normal" bkcolor="transparent" bkimage="" border="none,4," type=1 line=0 align=center use=ex num="0,black""]
حبيت أعلمك الغلا من وينه=أصل المكان ومنشأه بدرايه
لذعة شعور المهتوي من عينه=يبدا جنونه والغرام بدايه
لمسة محب عانقتك يدينه=يا غايتي ما عقبكم لي غايه
ماضرني بعد المسا يالينه=يا غانيه كوني إلى النهايه
قد طال صبري أخرجي السكينه=فلتقتليني وابتدي الروايه
قولي أتى من آخر المدينه=يقول موت العِشق لي منايه
وإن سئلتي عن فتى السفينه=قولي نعم وهذه الوصايه
أبا عُدي مات من بثينه=في بنت أمير وظل عقب هدايه
فلتقتلوا الأمير والضعينه=ولتجعلوا من مقتليهم آيه
قلبي من حمول التعب مشقينه=دزو عليه المعبثين وشايه
والعين ترجي ودها مسكينه=تحكي بنظرات العذاب حكايه
يالي وداعك ماتمل سنينه=متى رحول الشوق تضوي جايه
الحب كانه مات لا تبكينه=الموت ماياخذ من احدن رايه
وان عاش في وسط الحشا تلقينه=والقرب يا بنت الكرام كفايه
الحق يدَّا ليش ماتدينه=ولا عشان القلب جالك تايه
يابنت والي سخر اليقطينه=فوق النبي يونس عليه وقايه
والي خذل فرعون يوم الزينه=يوم ان كلن قال يا عصايه
مازلت احبك والغلا تدرينه=الجيش يثبت والدليل الرايه
والقلب زين الذكريات تعينه=يثبت ولو كان الثبات جنايه
يا راكب الي دوب شال اثنينه=من مصدر الي صدره بعنايه
عد الطويل وجد في تمرينه=واطلب سعدك وتبذله يمنايه
واخطر كريم للزمن حاسينه=واجلس واقر علمي عليه قرايه
علم الغريب الي هله ناسينه=قله تراني طحت عن مركايه
رفيقكم واقف على عظمينه=والموت اشوف انه مشى ممشايه
لعب الهوى ماجاز لي تقنينه=والقول سجل تو في مرمايه
والقلب معياره ضرب تسعينه=يغلي كما قدر على غلَّايه
والوقت قاسي والظروف تشينه=بلوى بلونيها على بلوايه
يا بنت بستانك سقينا تينه=لين استوى تينك على مسقايه
لرضاك سقت الي تبين بحينه=لو كان ماسقتي علي رضايه
سقت القمر لعيونك الثنتينه=سمعاً وطاعة جيت يا مولايه
والشمس و العقد احذري تنسينه=عقد نظمته من سما دنيايه
ذيك السنة شعري معك تقرينه=يوم القمر ضاوي على ممسايه
واليوم رحتي والجفا ياشينه=يا عنك ماقصرت في رجوايه
علمتك احساس الغلا من وينه=أصل المكان ومنشأه بدرايه
وان كان قرب الدار ماتبغينه=روحي فمان الله غيرك جايه
[/poem]