وامسيت عامين آترجَّاه باصفاده

[سلطان الوثر]

من نصّ النص

للخروج خفيفا







[poem="font="simplified arabic,4,darkred,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يطري عليَّ اللي (على طاري الصايم=والما .. وحُرم الشرب والشمس شهَّادة)
مع طاري ( ظْبيّة من الجوع ماجَفْلَت=ترتع بعين وعين للموت وزناده)
قلت : الخلا ياظْبَيْ مايخْلِي عيوني=طْيور في غفلة من الرمش هدَّاده
أشمْ زَفْرَك قبل لاتشهق تشمّه=واسمع سليلك بين مشطين وقلادة
لكن تراك آمِن من الغي والغاوي=إلاَّ الهوى مالك بقوسه وصيّاده
قال : الهوى أجرم من الغي ياهاوي=قلت : أَجْرِم ولاتتْهِم الذيب فبلاده
قال : البلاد وْسَاع / قلت : الحنين اوسع=قال : وحدود الشوق ؟ / قلت : اِحسب مْداده
مَعَك مَعَك من وين مارحت في روحي=من لحظة اللقيا إلى الموت والحاده
حتَّى ولو تترك لنا الدار وتغادر=يْردَّك اللي شاقته ريحة اجداده
قال :انت تحلم..! / قلت : مانمت ياحلمي=وياطول حلم اللي عصى الجفن مرقاده
وابشّرك شاعر وفي عشقك آهذري=لكن قصيدي عجَّز اقلام نقَّاده
أبحرت لك (مجرور) شطِّه (سبب) حتَّى=هاج وتصافق لك على الشط زبَّاده
وابطيت اجر من المواويل لعيونك=حتَّى النفس يضرب صدى وياخذ ابعاده
قال: انت صاحي ؟/قلت : لا لا أنا شارب=سكران داخل جو سيّد وابن ساده
مسجون في تُهْمَة ( هوى بنت ماتريده)=إلاَّ عَزيزاً ذُلَّ فِي العِشقِ ياغادة
خلّك هنا خلّك على زولك وظلّك=وآنا آتختَّل بك شقا الكعب وغياده
ياملطفِ خْطَيِّه على الروض لا استامن=ألطف من الهتَّان لاغاب رعَّاده
كنّه على صدري يرذّ الخطاوي رَذْ=ياويل قلبي من تولّيه وشْراده
أخاف يجفل يجرح مورّق عروقي=توَّ الوريد اهتزْ في برعم وداده
يرمش ويربش مرمشي في مرابيشه=يشفي غباش الشوف من غابش ارماده
ماصرت اشوف اِلاَّه من بَدْ أجناسه=كنّي كفيف و آتوكَّا بمرواده
حسبي على اللي صدّفهْ ليَّه المغرب=لابوه لابو صدّته عقب ترْدَاده
أقفى وصكَّ الباب مع غضّة وجضَّة=والروح راحت داخل البيت مِنْقادة
ياكبرها في حق عشقي له العذري=كنّه يصكَّ الجو في وجه روَّاده
أصبَح نهار العيد واضحى وخلاَّني=وامسيت عامين آترجَّاه باصفاده[/poem]