في بلاده
يتلقي صوت الدقايق بالثواني
والمعاني ضيعت درب السعاده
والمواني
ما رست فيها سفينه
والمدينه
كِنها فاضت بَلاده
والوطن ما به ملامح
والمصالح راسيه
والعواصف عاتيه
والسؤال يدور في راس التعجب
ما اكذّب
لو أقول هناك
أفقدني معاك
يا وطن لو تصالح
ما بقى فيني مصالح
" لن أصالح "
" لن أسامح "
وما أخاف الإعتراف
وما أخاف
يا بشر صرنا نخاف
وصرنا نزرعنا بَلاده
ونحصد الذل العظيم
في بلاده ما عرفها
هي بلاده ؟
يا بشر صرنا نخاف
من نظرة عيون اليتيم
ومن الهشيم
اللي يلوح بالجفاف
صرنا نخاف
وكنا نخاف
ولسه نخاف
يا مدوّن
شوف بعيونك وسجل
انت تسمع مو مثلنا
واللي يسمع ما يقدر
ما يِحزّر
نزرع الدمعه رغيف
والمناجل بالرصيف
تحصد ارواح الضعاف
دَوّن الدمعه إعتراف
دَوّن الدمعه إعتراف
منهو يمسح دمعة الطفل اليتيم ؟
منهو يفهم دمعة الطفل اليتيم ؟
منهو فينا يعرف البكي القهر ؟
منهو فينا عايش الدمعه دهر ؟
يعني لازم يفهمه واحد عقيم ؟
لو سألته عن همومه
كيف يقضي طفل جايع
كيف يومه ؟
يعني ضايع
ناظر بمنظر هدومه
تعرف همومه
دامنا فعلا نخاف
ما نهاب الإعتراف
لنه صاير حكينا
والكذب فـ حكينا
ما نخاف الإعتراف
ليه نخاف
الكذب حبله قصير
والدمع أمره يسير
والقوي ياكل ضعيف
والضعيف يضيع في هم الشريف
والشريف
والشريف !!
شنهو يعني يا بشر كلمة شريف ؟