[ بعيدا ً عن الرّقابهْ ] !

[تركي الحربي]

الحديث له ُ الأن :

طفولتي كانت طفولة ٍ قشرا " طفولة عدوّك " ، أمي جابتني على كبر قبل سن اليأس بـ دقيقه حملت بي ، كان وقتها أبوي متزوج على أمي وحده أصغر منها بـ عشرين سنه تقريبا ً ، ولي إخوان منها ، مرت السنين وكبرنا ، أخواني" مدللهم " أبوي دلال موطبيعي وأنا اللي متنيّل على عين الي خلفني ، تركني أبوي أسرح بـ الإبل " راعي بدون فلوس يعني " | أهمز مهماز الأولين | بـ ليل وبـ شتاء ولا أحد يسأل عنّى حتى أمي الله يرحمها " خرّفت " مرات أجي أجلس عندها تحسبني " سرووق " تقوم تحذفني بـ الرضم ، ترى عمري هكاالحين بـ قيام السبعطش ، وترى ليالينا شتا وبروق وأمطار وخير | أنعااااااااااام | إيه قبل لا أنسى ترى الشجاعه لك عليها فـ الليل ، تدري أيامنا هذيك ذيابه ومغازي وحنشل وأنا ورع ووحيد مع هـ البل مامعي غير خنجر ، المهم هـ/ كا اليوم أمرحت عند أهلي ويوم أصبح الصبح ركبت رحولي ومشيت من أهلي السما مغيّييييمه غيم ٍ أسود " يِخْرِعْ "

ي
ت
ب
ع

 

[تركي الحربي]

يُكمل الحديث :

يقول همزت عن أهلي لي حول يومين هالحين ، وبثالث يوم غابت الشمس وهي تشتغل علي " البروق والرعود " شي ٍ يسلب العقل ، صوااااااااعق ٍ متشابكه ، ضاقت علي الوسيعه مدري وين أرووح ، انا أبنحاش بس المشكله مدري وين أروح ، يقول أنا بـ طرف البِل ْ راص ٍ روحي على جنب الرحول قلت إن جت صاعقه تضربها هي " من الفهم الزايد " ، شف إن نيّتي قشرا وهي تضربنا صاعقه قريّبه فكّنا الله منها مالها شبيه غير قذيفة مدفع ، أنا تراي منبطح عند يدها اليمين وقريّب لرقبتها والرّحول تحذف رقبتها يمين علي وتضربني على " خشمي " والحمدلله ماصار شي بس " أرعفت " رعاف ٍ خفيف وشوي دوخه ، ماااااش انا ضاقت فيني الوسيعه ويوم شعق برق آخر نسيت الرعاف ، وأشوف لي جحر ماهو بعيد خابره قبل لاتغيب الشمس من حلاة الروح زبنته ، وأروح أركض يمّه ، أثاريه جحر " كلبة ٍ مجري " الله يكرمكم ــ انا مدري أحسبه خالي مابه أحد وأدخل عليها بـ رجليني هي و " جراوتها " ، ومن القراده جت رجليني على إثنين من جراوتها وأذبحهن ، وهي تهيج علي أمهن وأطلع من الجحر ركض من طيب الحظ

برووووق وهـ اللي تبي تنتقم مني وراي تخطّفني


ي
ت
ب
ع

 

[تركي الحربي]

حكايته بـ كامل تفاصيلها ،
أحاول أن ألتقط منها الـ مُضْحِكْ فقط ،
وإن كانت بـ أسلوبه هو ممتعه جدا ً وشيّقه أكثر بـ كثير من كتابتي لها !

 

[تركي الحربي]

إن شاء الله إنه أخر فصل منها
، لإنه دبلت جبدي ولهدتني هـ السالفه


يُكمل :

يقول عقب ماقضت هـ/كالليله ، صحيت الصبح " صردان " !! وثوبي من الرعاف البارحه بعد ماخذ ٍ حقه ، وجيعان ميت ٍ جوع وأشوف لي بيت شعر في " آآآخر الأفُقْ " وأطلّق عقل البل وأدك رحولي نيّتهُم ، يوم جيتهم يامار/ هُم ربع ٍ لنا " من جماعتنا " بس ماهُم قريبين حيل / حيل : مندفعين شوي ، راعي البيت شايب ٍ متهدلات جفونه ! ، ويحيي بي إبن الحلال ويجدد القهوه وهو يقوم ينشدني عقب ما " ريّعت "

+ وسم البل ماهو غريب علي ، أنت من أنت ولده ؟
- ولد فلان إبن فلان

+ ونعم ونعم ، يالله حيّه
_ بك البقا الله يحييك

+ ياوليدي وش هالدم اللي على ثوبك ، عسى ماشر ؟
_ معي رعاف ٍ يعاودني ياعمّي وإنطلق علي البارحه

+ كم لك عن أهلك ؟
_ لي حروة يومين


[ وتمر بنت ذلك العود ، ولا إراديا منه ينظر إليها ]


+ شلون هـ الأرض اللي جيت منها ياوليدي
_ والله ياعم من مشيت ليما وصلتك مالقيت أحسن من بنتّكُم هذي

[ يبي يقول مالقيت أحسن من أرضكم هذي : وحاس مرير الدنيا ]


الشايب حس في إني " إختلفت " وماحرّك ساكن بالمرّه خلاّني على عمياااي ، بس فيه شي غريب سمعته ورا الرّواق سمعت " حريم يضحكن ضحك مو طبيعي " !!! ، والشايب ساكت ويقلّب النار بـ الملقاط ومنزلن شماغه على عيونه ، هُم علامهم ؟ ، وأتذكّر كلامي وتضيق فيني الوسيعه ، قمت أبمشي قال لي الشايب وين ياوليدي تغد عندنا قلت السموحه ياعمي " أبروووح لـ أهلي " ، قال سلّم لي على أهلك قلت له يبلغ طال عمرك ، يوم طلعت وأسمع الشايب يضحك ضحك ألعن من ضحك حريمه تقل " صهيل فرس "



وصلت أهلي وقابلت واحد ٍ من أخواني ، " يطارح قلبه مطارح " ملقوووف ، وأسولف له السالفه ، أنا قلت إنه يبي يكتم السر أثاري قلبه " مشخال طحين " ، وهو يروح لـ أبوي ويعلمه بالسالفه كلها ، ماكلمني أبوي ولا نشدني عن شي ، راحت الأيام ونسيت السالفه لنا هاللحين حروة سنه وشوي ، وهو يجيني قال لي جهز نفسك نبي نسيّر لنا على رجّال ، جهزت نفسي ومشينا يوم جيناه وإلا ّ هذا هو أبو البنت ، أثاري بينه وبين أبوي صداقه قديمه وأبوي الظاهر عامل ٍ فيه معروف قوي ، ذبح لنا ذبيحه وغدّانا عقب ماتغدينا ، قال أبوي له أنا جاي ٍ أخطب بنتك لـ ولدي قال له " جتك " يابوفلان يقول وأنا بينهم " تآآآآكلت حياءا ً " !!


وأتزوجها " لاعااااادت من زيجه "


:
:

حكايته كانت نَتاجْ لـِ مُقابله أجرتها كوثر البشراوي من قناة mbc مع نائب في مجلس الأمه الكويتي وبعد أن أنهت كوثر اللقاء سألها هو :

_ أنت ِ متزوجه ؟
+ لا

_ تتزوجيني
+ أنا ما أصلح لك ياحاج

_ وليه ماتصلحين لي
+ أنا " يهوديه " ياحاج

_ لا والله مـ أنت ِ يهوديه : اليهوديه عندي فـ البيت


:
:
وسلامتكووو

:
:

مابغت تخلص هالسالفه ،
توبه أكتب سالفه طويله مره ثانيه