بيوت الطين

[علي الغانمي]

-


وحيد الدار ما يلقى مقاسمه الشقى والهم
على ذكرى السنين الفايته والحي واسواره

تزوره ريحة الماضي وصوره بـ الخيال : تنم
عن رسوم الديار وغصةٍ … بـ الحلق : غداره

يصبّحها الهلع من يوم شاخت ما مداها تلم
سوى مجلس تزفر من بقايا البن و وجاره !

على ضيقة مبانيها ، تيقّنت السعاده : ضم
رغمْ جداً بساطتها ... عرفت الناس عذّاره

بيوت الطين وأن ضاقت لقينا في دفاها الام
و مـن قـوة [ صلابتها ] عـرفنا الاْب مقداره

قبل لا تطوي الايام … فرحتنا بطعم السم ؟
وتاخذنا عن أحضان الْبساطه … عين زواره

وأنا من غبت ياخذني الحنين و ذكريات أشم
ممرات الطريق و بيت جدي و ملعب الحاره

عن أضواء المدينة والزحام اللي ساقها الغم
وصلت مْن اليقين أنّ الشوارع صدق : ثرثاره

عن الضوضاء فيها أختنق وأن عشت مدري كم
____ تمر أيامها تشبه بعضها … حيل دواره

و انا أبن الطين لو طالت مسافاتي وصبري ذم
أبرجع لو خذتني ، غربتي لـ / الحي و أختاره

- علي الغانمي