تبّت يدين البُعد

[عبدالله العتيبي]

انا الكلام اللي من الوجد مخنوق
حرفٍ يطيحه شوق وحرفٍ يشيله
ماكنت اظن إن بيني وبينك حقوق
حتى سلك بعدك بقربك سبيله
وفهمت معنى كل مطرود ملحوق
إلاوصالن ضيّع الله دليله
تبت يدين البعد لا صارت العوق
وتب النوى وايامنا المستحيلة
في روحي إحساس الغلا طار بي فوق
حتى هويت بساحق البُعد غيله
وتزاحمة دمعات عيني من الموق
تروي حكاية ألف ليلة وليلة
كان إحتساب الصبر في وقت مسروق
من غفوة الواقع بذيك الخميلة
حتى تساقط من غصن عمري عذوق
وتعرّت كفوف الليالي الجميلة
واصبحت ذكرى والغلا كرت محروق
والخطوة اللي خفّت اول ثقيلة
يوجع زماني لا خذا الشوق بالشوق
وحال النوى بين الخليل وخليله