جدار الملح

[محمد المغضي]

حاولت اتوب من الشعر بس مقدرت
كل ما اتوبه جاني من زيّنه لي

كل ما تركته.. مرّني بالذي قلت
واقراني من اول قصيده لجهلي

رغم الهدوء الذي ضج بي وشفت
رحلة حروفي اللي انتهت قبل وصلي

القاه يغريني وانا اقول له تبت
ويغيض بالصعب الذي فيني/سهلي

ياما عطيته فقد احبابي وشلت
منّه غيابي كل ماحب قتلي

ناولته عشريني / ثلاثيني ورحت
للاربعين وزادت ذنوبه حملي

لحظة حضوري فيه كانت اذا غبت
عن كل شي و ان جمّع التبغ شملي

ادري خذلته كثر ما حبني وعشت
داخل جدار الملح والريح قبلي

وادري هجرني بعد ماشافني بعت
عيني لنومي ..بس مـا يلقى مثلي