حــــــــــادي العـيـــــس!

[مشعل الذايدي]

صاحبي كم حلم ودّى وخاف انه يجيب
وكم غريقٍ ..من حلا الروح
صاح لعزوته !!
الف راعي كسّرت جرّته عوج النصيب
والف طيرٍ خانه الريح ..
وبرقع غرّته!!
صاحبي شفت العناقيد لا صارت زبيب ؟
مثلها أحلام الفقارى تجي مستموته !
كم بناتٍ في ضلوعي بكن أخو .. وحبيب
وضاع أجمل شي فيهن وكبن حروته !
( عندي صاحب قال لي سر وقلت ابهـ الجليب
وعندي صاحب قلت له سر ...
وسولف لمرته ؟! )
والقريب اللي بقلبي طعني من قريب !
ماتذكر يوم يتعب وأنا أمسح جبهته ؟
ودي ارحل يم ارضٍ بها الطيب يطيب
حتى لامنّي نخيته رما لي غترته
لي معك يا حادي العيس بالماضي صحيب
وين مالقيت وجهي ..
أحن لشوفته
كنت انا وياه خوّه من ايام الحليب
لافطن لي رحت اهذري وأذوب بسيرته
صاحبي كان تلومه على ترك الشعيب
بدويٍ حدّه السيل وضيع رمعته
ليه يغامر والهقاوي معه دايم تخيب وليه يصبر
وانت ادرى ..
بلعنة كربته ؟
صاحبي لاصحت تكفى.. أمانه لا تجيب !
كم غريقٍ من حلا الروح صاح لعزوته ؟!