لغز خفيف .. وين الأخ محمد الدلماني

[جود الرباط]

الزئبق؟!


يارب صح
ماودي أركب الباص ..:d

 

[مشعل العبار]

اصلن سياحه وونسه..

كم راكب يتحمل االباص وعساه مكيف..

وهل فيه ستاره ورا في حاله ان جود ركبت الباص ولا الباص اختلاط..

محمد الدلماني يقولون معك رخصه دوليه ف استلم الدرقسون..
انا اصلن ماقلت السبرنق الا ابيك تقول السبرنق ابي اسافر معك يقوولون خوي سفر

 

[عبدالله الشمري]

الأخوة الأعزاء

مشعل ذباح

فيصل البندر

عبدالله ثويني المانع


( أشكر لكم مروركم الكريم وتفاعلكم مع اللغز
وتفاعلكم مع الرحلة السعيدة إلى الهند وليس لبنان !!
من خلال باص المنتدى آخر موديل ولكن بدون تكييف )

 

[عبدالله الشمري]

الأخت العزيزة / جود الرباط

صح لسانك .. وسلم بنانك


نعم الحل هو ( الزئبق )

مقيولة / فلان مثل الزيبق ما ينطرح

 

[عبدالله الشمري]

الأخ / مشعل العبار

أشكر لك تفاعلك ومشاركتك معنا


وأنا أستغرب منك عندما تقول .. ( مافيه احد ياصاحبي مامعه مـخ )

فأين ذهب المخ في هذا اللغز الخفيف .
عموماً .. رحلة سعيدة

 

[مشعل العبار]

عبدالله الله يحييك

الزئبق الحل: اوكيك بس مايركب عليه بعض الصفات المذكوره بالابيات.. والالغاز لازم تكون وحده بوحده يعني مالها كذا تحليل....ف كيف لما يكون ماينطبق على اللغز اصلن..

1-ينحاش لافكه من الحبس حباس ..الزئبق ماينحاش اذا كان محبوس..بل يبقى مكانه في المكان الذي وضع فيه.. بعكس السبرنق الذي يكاد يطير.. والمثل اذا قيل فلان مثل الزئبق . ماينمسك لان من خصائص الزئبق انه ماينمسك بغض النظر محبوس ولا لا....


2-أنشدك عن رجال ما به جلاده(( الزئبق مابه جلاده.؟. لا يسمعك احد من الكيميائيين))


على كل حال: تسلم ولاهنت على هاللغز الجميل..
وارجو ألا تستغرب أن قلت مافيه احد ياصاحبي مامعه مخ..
لاني قلت في تكلمه الشطر.. لكن كثير اللي له ادماغ مغسول..

و ربما أني توقعت أن اللغز قديم.. ولكن الان أعتقد أنك أنت من كتب ألابيات ..
ف صح لسانك الف ونا أخوك

 

[عبدالله الشمري]

مشعل حياك الله يا الغالي

إنت الظاهر صحيح ما معك مخ !!
أو مخك مغسول ( كما قلت بنفسك )


أو الظاهر إنت تفهم الأمور بالعكس


يقول البيت الأول يا شاطر
( أنشدك عن رجال ما به جلاده .. ينحاش لا فكه من الحبس حباس )
وش دخل الكيميائيين في هذا اللغز !!
المقصود رجال ما فيه صبر ولا تستطيع مسكه إذا أخرجته من حبسه ( وهذا الصحيح )
وانت ( يا بو مخ ) مدري كيف قريت الشطر الثاني !!
فأنت تقول مستغرباً ( الزئبق ماينحاش اذا كان محبوس..بل يبقى مكانه في المكان الذي وضع فيه ) !!!!!!!!!!!!


أما البيت الثاني ( تضرب به الأمثال بالناس عاده ما له يدين ولا قوايم ولا راس )

ومقيولة / فلان مثل الزيبق .. ما قالوا مثل السبرنج !!
والزئبق ما له يدين ولا قوايم ولا ( مخ ) قصدي ولا راس


على كل حال اللغز فعلاً قديم وجميل وليس من تأليفي كما ذكرت .


أخي مشعل أنا سعيد بالنقاش المثمر والمفيد حتى تعم الفائدة وتزول الشبهات

انتظر مشاركاتك على الألغاز القادمة مع بقية الزملاء

ودمتم

 

[مشعل العبار]

هلا ياعبدالله

اعتبرها غلطه بالتوضيح ونا اخوك

فأنت تقول مستغرباً ( الزئبق ماينحاش اذا كان محبوس..بل يبقى مكانه في المكان الذي وضع فيه ) !!!!!!!!!!!!

اقصد:الزئبق ماينحاش اذا انفك من الحبس..بل يبقى مكانه في المكان الذي وضع فيه..

يعني لو فتحت الباب حق السجن وجيت بتطلعه مايهرب.. زي السبرنق اللي من تفتح الباب ينحاش..

وقالوا فلان يناقز زي السبرنق
لغز رائع ولاهنت

اخوك