إليّ ..

[بدرية البدري]

( إليّ )

يا بنت هذا الليل قاسي وخوّان
واحنا مثل ما قيل ناسٍ غلابه

انتي وهمّك والسهر زمرة اخْوان
كلٍّ يوفّي الْبوح دافي عتابه

قلبك حنان الغيم لا جاد هتّان
بسّ الصحاري ما وفتْ للسحابه

نامي لعلّ الهمّ يطْلقْك باحْسان
من قبْل نصحى مع هديل الكآبه

شدّي عليك الْحلْم وارْخيه أحيان
لا ينقطع ويضيع دربٍ مشى به

يا بنت هذا الليل ظلمة وأكفان
واحنا ضعاف وْمدّعين الصلابه

نجمع خسايرنا على كفّ ميزان
وتْرجّح الكفة دموع الصبابه

ونْضيع ما نلقى بهالكون خلّان
يوفون للي ضيّع لْهم شبابه

في عالمك يا بنت ما عاد إنسان
إلا تآخى مع جموع الذيابه

إللي خفى هاليوم لابدّ بيبان
وإللي انْقفل ف يْديك مفتاح بابه