زخرف

[نهار بن ممدوح]

[poem=font=",6,blue,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]

من غير ربك يفرج الهمّ والضيق=العبد ماله غير مولاه قوّه







لاضاق صدره واشتكته المعاليق=ونادى بصوته للوفا والاخوّه







وليا خذلوه اهل الوجيه المدانيق=يرفع يديه وللكريم يتفوّه







يدعيه في حسن العمل والتوافيق=ويكفيه من شر الزمان ودنوّه







ويذهب حزن نفسه وضيق المغاليق=ويبسط له برزقه ويرفع سموّه







ويصدق مع الله قبل ماينشف الريق=وقبل صديقه مايعاتب عدوّه







ويلقى الاجابه قبل ماطرفه يفيق=من غمضته ويرد يبغى علوّه







من واحدٍ بأمره جميع المخاليق=كانت وتفنى والحياه اتموّه







وهذي هي الدنيا وصالٍ وتفريق=كلٍ تبي تعطيه خيره وسوّه







محدٍ سلم منها وذبّ الشواهيق=الحاضره واللي مع أبله يدوّه







كل البشر تطرد وراها عشاشيق=حتى كبير العمر لاهي وتوّه







تغري قليل المعرفه بالمساحيق=وهي زخرفٍ فاني و وجهٍ مشوّه







والادمي ماصار له من لواحيق=كله مقدّر من بداية نموّه







عمره هدف واقدار وقته تفافيق=والوقت ماخلّد منار النبوّه







حاول تضع لإحساس قلبك مسابيق=ورشاك عن بير الملذات طوّه







مادام في قلبك غصون ٍ مواريق=عرقه من الايمان غذّه وروّه







قدام تلعب به هبوب الصعافيق=وماينفع الندمان ليته ولوّه







والموت لابده على ابن ادم مويق=يهدم ملذاته ويعصف بجوّه







حق ٍكُتب على النفوس بمواثيق=ولا جاء يتمّ مهمّته ماينوّه







اعمل مادام سنين عمرك زماليق=الوقت ماتظمن هناه وهدوّه







يمضي وحنا غافلين ومشافيق=وياقلّ مايصدق مع الناس نوّه







وقتٍ يذل اهل الوجيه المطاليق=ويعزّ في شرعه قليل المروّه







فيه الصقر يضرب حساب الغرانيق=ويُحقربه النادر ويقنص بوّه







من بعد ماهو معتلي قمة طويق=حطّـت به الايام في كل هوّه

[/poem]

شعر/ نهار بن ممدوح