ماي ٍ وطين !

[صالح بن فارس]

يا
سلاسة حب في قلبي
وأصعب ما ينال
يا
سعادة ميت بحبك
كره يحيا حزين !

بين فارق عنّي وتكفى بعد عمري تعال
راحت أرباحي خساره بين صدّك والحنين !

إن أجيلك من يمين تردي النظره شمال ..
وان أرد من الشمال تجيبي النظره يمين .!

لا حضرت أول جنوبك ترحلي يم الشمال
وان تعنيت لشمالك بآخر جنوبك تجين

لا وصالك به حنين ولا حنينك به وصال
والبلا إني كلما أوصلك زدتيني حنين ..!

فالزعل تحكي بلين وفالفرح حكيك جدال
ما عرفت شلوني آجادلك أو وشلون الين !

من قرا تفكيرك العاقل يحس اْن به خبال
ومن تهجا سيرة جنونك وجد عقلك رزين

فيك واقع دنيتي تروينه بعين الخيال
وفيك تذبل وردة الأحلام من مزن السنين !!

قلبي لحالك يبيك وباقي خلق الله لحال
والمصيبه ما يبيه القلب غير اللي تبين

الجواب يحير بشفاهك ويتفتق سؤال
والإجابه دون ما تحكين بعيونك تبين

ساعه آحسّك بيدّيني وساعه شي محال
والحقيقة كيف بقبض مائك بكلتا اليدين

من قساوة هالجبال ورق نسمات الدلال
التقي بك عزة شموخ وتواضع مسلمين

زادت الأيام والا قصرت طوال الليال
ينقتل صمتي على بابك ولا آعيشك أنين ..

ما أبي آخذ عليك أْكثر ويضرب بي مثال
ومن يعاشر قوم هو منهم اذا عدا اربعين

حينها بتْطبع بطبعك والاقي الحال حال
تشهدي بي حكمة المجنون واغلط عاقلين !!

وآتقلب بين زلة طفل وثبوت الرجال
بعضي أكبر من نظر عينك وبعضي بين بين .!

فـ لا جنوبي هو جنوب ولا شمالي هو شمال
وان سألتيني : وصالك وين جاوبتك بـ : وين ؟!!

يا سلاسة حب في قلبي وأصعب ما ينال
يا سعادة ميت بحبك كره يحيا حزين ....

كان وديانك بـ تنكرني فـ توفيني الجبال
ما يخون الجلد من صوّره من مايٍ وطين

وقتها لا تهمسي فارق ولا تصيحي تعال
دام صار الحال من بعضه فلا داين ودين