[ طـوّل غـيابـك ]

[سلمى فاضل]

يسعد الله أوقاتكم .. ويطيّـبها بالحب

هذا حضوري الأول واللي أتمنى إنه يكون لائق بذائقة الشعر ومتذوّقيه

:

:

:
[ طوّل غيابك ]








طوّل غيابك.. وانا ملّيت بغيابك
ملّيت أردّد: ( أنا في غيبتك ملّيت )

ملّيت أكذّب على نفسي بأسبابك
وآقول راجع.. وانته ما بعد حنّيت

ملّيت.. أو بالأصحْ ملّتني أبوابك!
واسأل ملامح غيابك في زوايا البيت

ما فيه ركنٍ تركته دون ما جابك!
يا كيف جابك؟ ولا اْدري به.. ولكن جيت!

جيت بصفاتٍ كثيره تشبه أصحابك
أو جيتني في أماني ما بها حسّيت

أو جيتني واصلٍ في روح أحبابك
أو ما بعد جيت ولكنّي أنا تمنيت

ملّيت أرتّب شعوري لحظة عتابك
ملّيت أحاول أسامح وانت ما أخطيت!

ملّيت أحس انّ حلمي عايش أهدابك
ملّيت أبفهم غيابك وانت.. ما ردّيت

ملّيت؟ ملّيتك؟ أو ملّيت أعصابك!
مدري ولكن ترى من جدّ أنا تأذّيت

وانته غيابك ولا اْدري ويش سوّا بك
أو انت في غيبتك يا غايب شـ سوّيت!

طوّل غيابك.. ولا غيره أبد عابك
طوّل غيابك.. ولا غيرك انا حبّيت

طوّل غيابك.. وانا ملّيت بغيابك
شفْ كم غيابك زرع في داخلي ملّيت!