منازلهم ..

[منتهى القريش]

نص قديم بعد التعديل .. وعذرا لـ قلوبكم ..
.........................

تمر سنين .. ولا مروا
واتانيهم
تمرني بس أساميهم
واتألم
ألملم باقي أوجاعي
واصفق راح على من راح
والكفين .. بالحسرات أحنيها

منازلهم
يا حي أصواتهم فيها
ومن غابوا .. رحى صارت
تدور تطحن .. لهيب الشوق
تتآلف مع العتمه
تشعلها .. وتطفيها

عيون اولادش الطيبين
يا ديرتنا نسيتيها؟
براءة ظافر وبندر
وحازم لا لعب بالطين
ومنوه ما ذكرتيها؟

يمه وين
أمينه وبنتها نسرين؟
ترى ماتوا؟
ولا بعدهم حيين
جارتنا تذكريها؟

أحن يمه .. لـ ملقاها
أحن للقعده وياها
يمر الشوق ياخذني على غفله
لـ هوى الديره
لـ اغبار شارعنا
لـ الليل .. والفانوس
واللمه .. والجيره
سحايب شوق يا يمه
تمر بالروح
ولا ادري كيف أداريها

علي الأكبر
كان كثير يعليها
أمانينا الـ نغنيها ..
يقول لي:
بقطف النجمات لـ عيونش
يرسم حلمنا أشعار
أماني كبار
يكتبها على روحي
ويبروز فرحتي بيها ..

أتذكر
عبدالله والدكان الدفتر
طفولتنا .. براءتنا
حارتنا
رواق البيت
لما كنا نتعلم
بدايات العشق والخوف
وامانينا
الـ نخبيها وسط لرفوف
ودنيانا .. برغم الضيق والتقتير
كانت غير
صدق كنا .. نحبها حيل ونغليها

اشكثر كنا
أنا واطفال حارتنا
تتشابه ملامحنا
نتمرجح على لغيوم
ما نعرف أسى واهموم
وضحكتنا
اشكثر كانت
نقيه صافيه كـ الما
بوسط الروح لو جفت
سلام وحب نرويها

خذتنا دروب يا يمه
ما نعرف تواليها
شوفي كم سنه مرت
ولا مروا
تمر أطيافهم بـ الباب
أثاري وعدهم كذاب
تموت الحسرة بـ ايديني
واداري دمعتي بـ عيني
ونار الشوق يا يمه ..
بـ اوجاعي أطفيها

منازلهم
خلت منهم
يا حي اصواتهم فيها..