اوراق مبعثرة!!!

[محمد علي الثوعي]

ياللي كتبت الشعر عذب الترانيم
اجاوبك والقاف حسب اعتمادي

تكتب وترسل من جديد التعاميم
لكن مناديبك غدت وسط وادي

واللي يحب الشعر جاد المفاهيم
يعرف مضامين الكلام انحيادي

شاعر محنك تلتزم بالتعاليم
واليوم نهجك مختلف ياعبادي

اظن قلبك سلم الأمر تسليم
واصبحت عاشق يارفيقي وغادي

مجنون ليلى عاش ضمن المظاليم
واظن ليلى ماتجيب المنادي

تاريخنا فيه الحكايا مباهيم
من زوّره غيّر جميع المبادي

حنا عشقنا والمشاعر مقاسيم
واللي بباله حاضرٍ في فؤادي

اوراق حبه ماهي مثل المراسيم
ماتنتشر بين المدن والبوادي

شاعر ولكن عندي فكر ٍ وتنظيم
مبعد عن ارباب المكر والفسادي

ماجيت في درب الخطا والملازيم
ياكثر من يفرح بعثرة جوادي

يوم الخيول المسرجه والمجاهيم
الناس تعشق تحتفظ في الودادي

ماينقصك في الوقت فهم ٍ وتعليم
لا تعتذر واللي حدث صار عادي

الطيب يبقى بالرجال المحازيم
مادام كل ٍ عن رفيقه يفادي


محمد_الثوعي