""أبيك أو ما أبيك""

[سلطان المضعان]

أضحك وأجامل وأبتسم والقلب مكسور وجريح
كله من أفعالك معي والله يصبرني عليك

حبك تملكني وأنا من جور تعذيبك طريح
ساعدني تكفى أنشدك إما تجيني وألا أجيك

ياجارح القلب الحزين خلك ولو مره صريح
لاتزيد همي بالسكوت وإرفق بحال اللي يبيك

لاتجازي ببخلك عطاي ياللي على وصلي شحيح
إرحمني وإمسح دمعهٍ من فوق خدي تنتخيك

من غير شوفك يالحبيب يضيق بي الكون الفسيح
وأحس أنا كني وحيد في مجلسٍ ما يحتويك

ضيعتني بدرب الغلا وجهني للدرب الصحيح
إنسى الأنانيه وحب شخصٍ متيم هام فيك

تشقي محبك ليه ليه يصرخ ويسألك ويصيح
غافل ولاتدري بشيء..خذلت قلبٍ يرتجيك

أعماك عن حبي الغرور وإلا كلامي والمديح
إفهم سؤالي وجاوبه يابايع اللي يشتريك

جاوبني ب"لا" أو"نعم" من حيرتي لجل أستريح
ولاشفتني انسى الحياء قلي أبيك أو ماأبيك!!




6/9/1419هـ