أوهامي المشّايه

[عبدالعزيز الرميحي]

انت ياللي تترك أحزاني معي وتولّي
ليه تتركني كذا بين الظنون التايه


اتجاه القلب يمك ما تغير ملي
وانته نهاية جنوني بالهوى وبدايه


في متاهات الوله ظلي يطارد ظلي
في رجا غيث السحاب اللي يبل ارجايه


كنت احسب اني وحيد الشف بك ياخلي
ما دريت انك كريم الصد بي وبلايه


جيت لك بين الامل والياس وانت تخلي
من طلب برد الوصال يصير في غلايه


وانت خابرني على كثري حنين و قلي
واحدٍ ما يسمع بخله قليل وشايه


لا عطيت القلب وصل ولا حنين يسلي
بين خلق الله تعيش أوهامي المشايه