تنسى وقتها وينك !

[زايد الرويس]

كل عام وأنتم بخير ,,



وتاخذك السنين , وتلتحف صمتك, وتنهيدك , وتصبح كلمتك قيدك , ولا يشكي من سكوتك سوى صوتك , ويغسلك الجفاف وما تسيل إلا دموعك بينك وبينك , وتنسى وقتها وينك

حكاياتك : يباس العمر , وأغصان أغنياتك ذابلة , والريح تكسر كل ليلة غصن , وهذا الحزن جمر , وتفرك يدينك , وتتناثر مشاويرك, وسرك ما هو فـ بيرك , وتنسى وقتها وينك

تعدتك الدروب , وما لحزنك من غروب ,, ولا لضيقاتك هروب إلا لشطآنك ,, وتجلس ترسم أحزانك ,, وتتبسم لها واحد ورا الثاني , وتخنق دمعك فـ عينك , وتنسى وقتها وينك



أمرر الضحكة على شفة الوقت
يطيح دمعي من عيون الليالي

كني على أسوار عمري تعلقت
وأخاف أطيح .. وسور الأيام عالي

من كثر ما جفت سنيني .. تورقت
على غصون حكايتي وانعزالي

على كثر ما قلت لــ أحلامي : اشتقت
اشتقت أحقق كل ما جا فــ بالي

حلمك هو أنت .. إذا تحقق تحققت
وأنا أجمل أحلامي غفى في خيالي

يكذب علي الحلم وأقول : صدقت
يجوز حلمي يحققونه .. عيالي