[ . . على متن السحابه يا سحابه . . ]

[فهد العباري]

السلام عليكم ورحمة الله وبركاته

صباح / مساء , , , الود معطر برائحة الورد

لتجديد التواصل

مدخل

أعقل رجل يصغر ليا شب غيره
. . . . لن المحبه رمحها حيل ذباح

ماعاد عقله فالمواقف شويره
. . . . مجنون حب شلون بيعيش مرتاح

ترى الهوى لو يختلف في مسيره
. . . . مثل الرطب لا حفـّه الطير ثم طاح

عطني سبب للجرح وأقول خيره
. . . . أستاهله لا صرت عاشق وسباح

و دام الهقاوي في غلاتك كبيره
. . . . خلي الوفا من بيننا نور وضاح

لك في خفوقي بيت شيخ وعشيره
. . . . يشاركونك حزن من قبل الأفراح

شوفي غلاك شلون ينفح عبيره
. . . . تهدينه جروحك ويهديك تفاح

مابي اطولها لو إنها قصيره
. . . . انا أغار وغيرتي سمها ذحاح

على متن السحابه

على متن السحابه ياسحابه
. . . ابرسل لك من فنون الخطابه

قصيده تخبرك وتقول حبك
. . . يزيد وزاد به صدري رحابه

ياورده حطت الورد بشعرها
. . . وظهر بالوردتين اكبر تشابه

الاولى وردة بلون البنفسج
. . . والاخرى نور عيني لا غرابه

ملاك وسيًدة سيـد التواضع
. . . سؤآل وتعتذر عنه الإجابه

خذت من هالبني كل الإنوثه
. . . وخذت من هيبة الفارس مهابه

جسدها منه هالعالم تعطر
. . . يعبو الغرش لازاد إنسكابه

وسواليف الخجل فيها حكايه
. . . يتوه العقل لا منه حكابه

كراميل البشر اقرب مسمًى
. . . تسوق اللي نظرها للإذابه

اشوف الغاليه بيت السعاده
. . . وانا يمناي تمد صوب بابه

متى تاصل يميني باب بيته
. . . واودع وحدتي ودنيا الكئابه

واغني صارت الدنيا جميله
. . . يـ اجمل ما حمل حظي وجابه

عجب للشعر لا منه لفاني
. . . يعلمني الرسم قبل الكتابه

مخرج

أحبك كثر ما وقع القصيد بظامر المشتاق . . .
وأحبك كثر ما عذب اللحون تهيض شجونه

أحبك كثر ماينبت على غصون الشجر أوراق . . .
وأحبك كثر ما هبت رياح ومالت غصونه

أحبك كثر ماأحسك سكنتي داخل الخفاق . . .
وأحبك كثر ما عيني على شوفتك مفتونه

أجل وشلون ماحبك ومثلك فتنة الخلاق . . .
حنان الكون في قلبك ودلوعه ومزيونه

ترى ماغيرنا ياغاليه في هالزمن عشاق . . .
ولا به غيرنا أحدن فدى غاليه بعيونه

بنيتك قصري الشامخ بنيتك حبي العملاق . . .
رياح العذل لو هبت محال تزعزع ركونه

فهد العباري