ارث

خليفه الصائغ · 02-19-2017, 11:38 AM

قصيده مشارك بها في مهرجان سويحان لهذا العام ولكن ما صار لها نصيب

*ارث*

تزف الجاهلي فرحه وذكرى واحد وسبعين
تشك داناتها السبعه فـ عقد ٍ زاهي الوانه

تشيّد من عزم قايد صروح ٍ ثابته وتبين
على قفار ٍ عليها خيام ، رملة تبر مليانه

ومفلى بوش تسرح به مطايا ناسه الطيبين
وحصن المقطع الشامخ وشير ثمام رويانه

وجهزها لـ جل شهم ٍ موثقها برباط الدين
حزامه شعب، تاريخ ٍ، تراث اجداد عمدانه

يـ نعم الدار والراحل، وقايدها الحكيم الحين
يكمل سيرة الحكمه ،،، يعمرّها مع اخوانه

وحرص يحفظ تراث، يصون كل الذكر لليايين
رجال حزام لدوله يصونوا كل شي صانه

يـ شيخٍ وارث الامجاد منصى الهايم المسكين
يـ رحمه فالارض تمشي بعدل وطيبة احسانه

واحياء أرث متواري بـ ماضي ما يعرف اللين
صعب في كل تفاصيله مشيّد بيد شيبانه

عزم يبني حضارات ً ،، ويحفظها بيوت الطين
لـ جل ترقى امارته ،، ورثها يبقى عنوانه

لـ جل شعبه واجياله يعرفوا اهلهم مـ سنين
يعيشوا كيف؟ ويشوفوا المويجي كيف بنيانه

مزاين بوش ، عياله ، ورزفه ترتقي ما بين
شموخ الطين والصقر وبداوه وطيب عربانه

وصيد اللؤلؤ واهوال البحر في لوحة الماضين
ولهم يشهد ثرى الجالبوت ، والبحار ، والدانه

ورسم بسمه فـ بينونه وبانت فـ الفجيره حين
لمع نجم فـ بني ياسه وتعزي بعز عجمانه

ومرود حُب من يده يكحل بوظبي والعين
يعطرها بانفاسه ،، وصية طيب فاعيانه

دُبي والشارقه تشرق شمسهم من فرحها لين
على تاريخها المشرق تجي وتلملم احضانه

وراس الخيمه تتبخر ، ودار الجود ام قيوين
فـ راس مقابر ام النار حضارة شعب مزدانه

لقائدها الحكيم الفذ وذكرى واحد وسبعين
وسيرة ارث ضارب فـ الجذور بـ كامل أركانه

يجول حفيت بالعازي يجاوبه البحيص لهين؟
وقال ؛؛؛ لشيخها الغالي ، مأثر أهل طربانه

خليفه الصائغ