رسآله

[أحمد المالكي]

عزيز النفس مايرضى على نفسه تذلينه
~ ولوجاه الهوى من باب قفل كل بيبانه ~

وهرج الحب واحساسك عللى غيري تمشينه
~ اوديك البحر بايدي واردك منه عطشانه ~

قريتك مثل مكتوب ٍ وباين من عناوينه
~ تمنيته يخالف محتوى المكتوب عنوانه ~

لقيتك مثل ماظنيت , غير الي تقولينه
~ الا يامكذبه قلبك والا ياكثر خلانه ~

الا ياطيري الي عافني وانكر جناحينه
~ تخير بالهوى غيري سجنه وقص جنحانه ~

الا ياضحكة شفاته والا ياورد خدينه
~ والا يا عينه النجلا وساع و سود نعسانه ~

والا ياريحة الكادي وفاحت من بساتينه
~ والا ياحلى فصول العام في روضه وبستانه ~

صحيح الزين مايكمل ولا يبقى على زينه
~مصير الوقت يتغير عليه وتذبل اغصانه ~

يجيله يوم في عمره ولا يلقى محبينه
~ وانا اشهد مايدوم الا عظيم الشان سبحانه ~

بامان الله , في حفظه , ومثلي ماتهمينه
~ انا من باعني بعته قبل لاينطق لسانه ~

حشا لو حن له قلبي قلعته من شرايينه
~ وقلب ٍ يكسر عنادي قلعته هو وشريانه ~

حرام وتحرم دلالك وفنجال ٍ تصبينه
~ حرام ويحرم المجلس وتالي القوم ضيفانه ~

قبل مارحل معي كلمه , من الي طحت من عينه
~ رساله جيت اوصلها بنص الحرف يافلانه ~

عزيز النفس مايقبل على نفسه تذلينه
~ ولو جاه الهوى من باب قفل كل بيبانه ~