تحقق الحلم

[عبدالله البطي]

سرت مجاهيمها والبرق يتلاها
ممطوره الارض والشعبان ممطوره
تقطن بديحوحتن من وابل جاها
يامصور الفلم خذلي عندها صوره
فصل الربيع بنسايمها ومرعاها
اتهيض الشاعر انه يكتب شعوره
الشمس غصت شفقها حين ممساها
والارض تبلع طوارفها وهي كوره
لين اختفت والنجوم اداعب اتلاها
وبان القمر وابتدى بوجه السما نوره
وفي لحظةً مثل ومض البرق سواها
جفني بعد ما دموعه جتك مذعوره
بعد ان ثقل دمعها ثم هل لك ماها
لاتعاتب الدمع لو ماهيب معذوره
صحيح جسمي معاندها ويعصاها
وصحيح قلبي شديد وساطي بزوره
لكن غلاك القديم وحبك ادماها
يجبر عيوني وهي بالحب مجبوره
كتبت الفيةً في حبك انعاها
بطلالة الحب مكبولة ومقهوره
الناس تقرى شعوري وانت تقراها
وامواصلك نذر ما اخونك ولا ابوره
ومرت ثمان وعليك النفس وش جاها
كنها عليك انت بس اليوم مأموره
كم بنت تدعي ضميري بس ما امداها
القلب محظور لك والنفس محظوره
ما اعس دربً ماهوب النفس تشهاها
الا انت مشهاي نفسي فيك مسروره
قلبي حلومه ونفسي واكبر امناها
تحقق الحلم فيك وعاشت الثوره
انا احمد الله جاب الي تمناها
ولكل من هو دعا والناس مشكوره