[ إحساسُ ميّت ] | مصافحة لـ قلوبكم ،

[محمد الكحلاني]

أسرة [ أبعاد أدبية ] .. الجميلة

أسعد الله أوقاتكم ، وكل عام وانتم بخير

اليكم مصافحتي لـ قلوبكم

دعائي أن تمتعكم .

//

بداية يوم عادية
.... نهاية آآآخر علومي

[ مُدخل :

أفكارٌ تحدثني عن الآخر الراحل



فأصرخ
صرخته المفجوعة
أشهق
شهقته الموجوعة
قطرات دموع ٍ تتوالى
ومشاعر .. لا تغني جوعه

ماذا لو .....؟
ماذا لو .....؟
ماذا لو .....؟

بداية يوم عادية
نهاية آآخر علومي



عسى ما شر
وش القصه ..؟
وش اللي صار يا قومي
وباقي انتظر راقد
ولاني فقت من نومي
صحيح اللي تشوفه العين ؟
صحيح إنّي غديت اثنين ؟
أو انّه عالم أحلامي
تطاول وافتعل لومي ؟!

ألا يا فلان
تسمعني ؟
تعال اقعد
كلمني
انا مثلك .. بشر
اصبر ..!
وراك اتروح ؟
علمني
وش اللي صار في يومي ؟

احس بشوقك لشوفي
واحس اني عجزت اوفي
مقيدك الحزن .. زعلان
ودمعاتك على كتوفي
ابي افهم
وش القصه ؟
ابي افهم
كفى أحزان !
خذاني الموت ؟
علمني
خذاني الموت ؟
... يا خوفي !


وصاتي لا يفاجئكم



بيقبل يـوم يـا ربعـي .. وأفارقكـم
______ولا أدري من هو الحامل وأنا المحمول

مثل ما جيت إلـى دنيـا .. تباعدكـم
______ابـ/ ارحل لاامر ربـي وأنـا مذهـول

فـ/ بطن الأرض وحجاري أمارتكـم
______مثل يومي فـ/ بطن أمي بشر مجهول

و تبكونـي وتحكوني لـ/ حارتـكـم
______وأنـا والله ودي إن الدمـع مَ يطـول

ابي فرحه ./ ابـي ذكـرى توانسكـم
______ومابي حزن كن بـه قاتـل ومقتـول

ابي قـول(ن) لعـل تُقبـل شهادتكـم
______وابي دعوه تطمّن روعـة المسئـول

هي الفزعة عسـى ألقـى شفاعتكـم
______مهاجر والأمل ابقـى بكـم موصـول

وابـي أمـي تحمّـد خيـر خالقكـم
______تقول انها رضت عني وانـا مقبـول

وابوي اللـي تخيّـر لـي صداقتكـم
______ابي بسمة شفاتـه دايمـه مَ اتـزول

وارد احيا واشوف اش حال امانتكـم
______واناصح من لسانه افسـد المحصـول

واصير الماضي الحاضر فـ/ حاضركم
______واصير اللي على مستقبلـه مشغـول

ولا تنفـع وساطـه .. ولا جمايلكـم
______ولا تُقبل مشاريـه(ن) ولا مرسـول

كتابي سجّـل حضـوري ومفارقكـم
______صغيـرات وكبيـرات الـذي مبـذول

ترى مـا تغفلـه ذرة افـ/ بواطنكـم
______ولا يحتار مَنْ فاعـل ومَـنْ مفعـول

إذا كـان العمـل رمـز لمنابـركـم
______ابد ما صار بـه عـاذل ولا معـذول

واذا كـان الأمـل جابـر خواطركـم
______ترى كسر الخواطر ضيعـة المأمـول

وصاتي.. لا تخلّوا المـوت يفاجئكـم
______وصاتي.. إنْ ينذكر دايم و له مدلـول

فكم شيخ(ن) سكن راهـي عَمارتكـم
______ويلجم فرحته صمت(ن) وهو مشلـول

وكم طفـل(ن) بكتـه أم(ن) تطالبكـم
______ويغطّي هالكفـن جثـة طفـل مبلـول

وكم عاقل خـذاه المـوت / يعاتبكـم
______وكم جاهل يهيم ابـ/ سكرته مسطـول

وكم زالـت حضـارات وحضارتكـم
______بترحل معْ مهب الريـح وذا معقـول

هدم لذات وبيجي افـ/ يـوم هادمكـم
______وكل(ن) تارك(ن) خلفه الذي معمـول

فاذا هو خير إلـى خيـرٍ مصايركـم
______واذا هو غير فالبلوى الخطا المنقـول

: ختام ]

ابي ارجع ..!!
لكل اللي تناسيته
ابي ارجع ..!!
اواجه ما تلافيته
وبهجر كل شي سيء
ولا كني ابد جيته !
وباقي الوقت
يا الله !!
وباقي الوقت ؟
.. واكررها ؟!
نسيت أبويه وأمي
نسيت أهلي
نسيت اللي تعبوا لأجلي
عيون الناس تبكيني
واحس ان دمعهم يكتب
وش الاعذار ..؟!
.... وش ظروفي ..؟!
خذاني الموت؟
.. ياخوفي !

لـ/ قلوبكم كل الود والتقدير