[نواف التركي]

.


.


.



.



[POEM="font="Simplified Arabic,5,blue,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يالهاجس اللي من ثلاثة ليالي = تحدني يمّ القلم والكتابه

ماودّك تفارق وتعتق خيالي = شف لك خليٍ يفهمك طق بابه

قدّر ظروفي ..غربتي وإنشغالي = لاتعزف براسي حنين الربابه

بلشت في رزقي ولقمة عيالي = وعجزت لأمشي في زمان الغرابه

أشيل لي حملٍ يفوق إحتمالي = وبالصدر أكنّه عن غريب وقرابه

لولا أخواني قلت مافيه غالي = ولو ما أمي أقول القلوب تتشابه

ولولا أبوي أن كان ما جيت عالي = في عالمٍ كنّه قوانين غابه

مسّاحة الجوخ العفون الحثالي = في هالزمن صاروا قرومٍ ذيابه

مالك ومال الهم مالك ومالي= مثلي حضوره يكتشف في غيابه

ياهاجسي ماعاد للشعر والي = في ساحةٍ فيها الغثى والرتابه

تقرى العيون حروفي ولا تبالي = ماغيري اللي حس فيه وشقابه

محدٍ سواي يحس وشلون حالي = كم مر معنى محدٍ قد درابه

وكم بيت صغته من قراحٍ زلالي= مرّوه عطشى ما أهتنوا في شرابه

وكم بيت سنّيته على ما طرالي = أمضى من الشلف وبقى في جرابه

خذى الزمان اللي خذاه وبقالي = عمرٍ قليل أوزّعه للغلابه

مع الدروب المقفيه صرت جالي = أطرد ورى الحلم القديم وسرابه

يا هاجسي كان الشعر راس مالي = واليوم أدوّر للدعاء إستجابه

يارب عبدك وأستغيث بسؤالي = رحماك هذا الهم أنا مبتلابه

يا الغافر المنّان ياذا الجلالي = أطلبك عتق من الشعر والكتابه [/POEM]