[طلال بجاد]

.
.



الإهداء : لفتاة خُلِق الحُب لأجلها .. !

لاصارت الريح لأنفاسك عذوبة مدى
.......... وش عذره القمح لو ماطار من شفّتيك !
في غيرك المدح ..في لحظة وجودك : سُدى !
.......... مادامك أكمل حرام يصير غيرك شريك !
ياوردةٍ من كسلها تشكي من الندى !
.......... يامزهريّة بهيّة .. عطرها يحتويك .. !
ياروح .. لو صفّوا الأرواح صارت : ردى !
.......... ياراحة الميّت اللي مرّ قبره "يبيك" !
يا أغنية من ضلال .. وأمنية من هُدى !
.......... يادانية والمشاعر .. قاصية تحتريك !
يابال بالي .. إذا روّق وغاض العدا !
.......... ياجوّي الخرمان .. لا عمّرت راحة يديك !
من قدّكي.؟! قدّكي يسلب حكيـ..هم : عَدا !
.......... مادار حولك .. وحولك حلم ليل ومليك !
من قدّكي.؟! .. قدّكي لا مال كلٍ بدا :
.......... يستجمع أفكاره اللي بالشعر تشتهييك !
كذا لعبتي بـ..هم .. يوم الصباح إبتدا
.......... يرفع جبينه لجل يوصل لقاع إقدميك
وش حيلته .؟! والدلع بأقصا دروبك عَدا
.......... وش حيلته .؟! .. والولع منّه تساقط عليك !
وش حيلته دام فكره .. كل فكره غدا
.......... أسير عينك .. وعينه ذايبه منك فيك !
ياملهمة .. سلهمة عينيك كـ المبتدا !
.......... يوم الخبر فرحة العشاق في ناظريك .. !
يامهملة .. ما بقى في حبل صوتي ندا
................... إلاّ وناداك .. لكنّ الغلا معتريك !
يفتنّي الصبح كان إنساب فيك وشدا
.......... وأستسقي الغيم من لولوّتك وأرتجيك !
صلّيت بالغيب .. يوم إلك الضمير إهتدى
.......... وأرسلت لك دعوتين وحلم ودّه يجيك
دعيت : "يارب مايذهب قصيدي سُدى !
.......... يارب أضمّك .. وأذوق الشهد من شفّتيك" !"