[نوف الناصر]

[ خذلان ]

‏ما قلت لك إن الخواطر كسرها موجع كثير
وانك كسرت بْخاطري ما ودّك بْكسري بعد!!

ما قلت لي إنك ظلالي في مسافات الهجير !!!
حتى غديت الشمس والخنجر وصدري لك غَمد

ما قلت لي دامك معي تأكدي إنك بخير..!
وعدتني حتى شعرت ( بْخير ) واخلفت الوعد

تركتني في منتصف حزني وواصلت المسير
ما قلت لي إنك ولد عمي ولي ظهر وسند!!

واتذكر إني قلت لك في يوم والواقع مرير
بأنني أصبحت أخشى أن أكون اللا ( أحد )

كنت اتدفا في ضلوعك عن ليال الزمهرير
صرت اتهرّب من شتا صدرك ومن صدر البَرَد

خذلتني ..تركتني عن مورق اغصانك أطير
والطير لا منّه رحل ما يذكر اغصانه أبد !!

مديت كفّي يمكن القى في تفاصيلك غدير
كانت تفاصيلك جفاف وكانت كفوفك مَسَد

واصبحت أنا مثل الشعور المر في قلب الكسير
اللي تكسّر خاطره … لا تكسر بقلبه بعد !!


مارس 2023



تويتر

https://x.com/too_simple_girl/status...-Zv_esWEdZ8POQ

أبعاد

http://www.ab33ad.com/vb/showthread.php?t=44236