ياللي غيابك طال واليوم بغيابك عن شهر
إلى متى وانا اصْدَق العشاق وانتي جافيه؟
تتمنعين.. ويجري بـكلّ الشرايين /القهر
وتهبّ ريح الياس وآمالي شموعٍ طافيه!
ما باقي إلا القلب من نار إنتظارك ينصهر
لو ما الصبر يرخي على متونه عباةٍ ضافيه!
المشكلة رغم امتداد الحسرة بـقلبي دهر
اغليك لو كانت سما عشرتك ماهـي صافيه!
قصيدتي.. ياحملٍ يهدّ الظهر، مدري ظهر
يسندني إن طاح الوفي في ناس ماهي وافيه!
كنت اجهل إنك هـمّ متواصل وتفكير وسهر
واثر الجهل لو هو "مرض" في بعض الاشيا "عافيه"!
تعبت وانا ادفع لك من الروح والراحة مهر
ليتك مثل ما الناس قالوا عَنْك : وزن وقافيه!