رجعت مثل أول على نفس الكلام
و الشاعر اليا غاب مده يندمر ..!
مبطي تركت الموهبة دون اهتمام
و الناس ما تبغى غيابي يستمر ..!
و الشعر في كل انقطاعة و انتظام
كم شاعرً يطلع و شاعر ينغمر ..!
و أن هب نسناس الهواء غربي و شام
جتك القصايد و الشعور المنهمر..!
يا صاحبي اترك عتابك و الملام
أنا القصيد اللي معك طول العمر..!
ياما سهرت الليل و العالم تنام
اكتب و أنا قاضب على كفي جمر..!
وشلون أحب النور و أسب الظلام
لولا ظلام الليل ما شفت القمر ..!
على الصراط اللي اشوفها ما استقام
النفس تعصاني و أنا امرها امر ..!
شفت الغراب اللي مشى مشي الحمام
وشفت السلق توقف مثل وقفة نمر ..!
و اخر نتايج عولمتنا ،، للهدام
و الجاهلية عودت يا أبو عمر ..!
ليه؟ المزارع لا دنى وقت الصرام
َتموت ،، ما فيها حياة و لا ثمر ..!
نعوذ بك يارب من شر الأنام
إذا قرينا الفاتحة بعد الزمر ..!
حنا حشام و نعرف الناس الحشام
و الكلمة الهزلة علينا ما تمر..!
وشلون يتكلم عن البيت الحرام
اللي ما حج البيت و اللي ما اعتمر..!
و اللي على وجهه ملايكة السلام
ما تقترب منه الشياطين الحمر ..!
محمد بن شتير