[رضا الهاشمي]

((مَنْكَب الإتّكال ))

نفسك اللّي مكرمنها لا تذلْها
ما ورا بعض البشر إلّا المذلّة

وحاجهْ امْلحة على الرحمن خلْها
وثقْ بأنْ خلّيت شيٍّ في محلّه

والمسايل لي عجزت إنّك تحلْها
كلّ شيٍّ عند ربّ الكون حلّه

تثقل احْمول الهموم وما يشلْها
غير منكب الإتّكال ومنْ يكلّه؟

نقصد الرحمن في دنيا أجلْها
بين غمّ و بين كرب و بين علّة

و إزْهم أهل الجود لي رابي أصلْها
ع الكرم و الطّيب لهْ باب ٍ تدلّه

والطّريق اللّي الكرامة ما تدلْها
جنّب ارْيولك ولا كنّك تدلّه

ولا تصاحب زمرة الدنْيا وأهلْها
ولا تصفّ بْصف تلقى فيه خِلّة

وكلمةٍ فيها الهُدى بالله قلْها
لأنّه أصْحاب الهُدى يا صاح قلّة

في ملفّات الحياة وفي سجلْها
ما يحوز السّيف إلّا منْ يسلّه

ولا يطول أقصى العوالي في جَبَلْها
منْ طموحه يرتقي سيحٍ و تلّة

دنيتك نحْلة... تبي تطْعمْ عسَلْها؟
جرّبْ اللّسْعة و ذوق الشّهد كلّه

رضا الهاشمي