منتديات أبعاد أدبية - دمـعـة طـريـق

السلام عليكم ورحمة الله وبركاته ,

أعتذر على قلة التواجد فالأيام الماضية ..

وعسى أن تشفع هذي المتواضعة ,

وعسى أن تكونوا بخير جميعاً

ويتقبل الله طاعاتكم ,

بسم الله

أحيـان تنـزل دمعـتـي لا ذكـرتـه
وأحيان أقول الحمـدلله علـى البيـن

ذاك الطريـق الـي تعبـت وعبرتـه
يمكن يكون أحسـن وخيـرة للأثنيـن

وش فايدة شعري ليا مـن كسرتـه ؟!
هو فيه حدّ ٍ يستلـذ فيـه بعديـن ؟؟!

والحب مـن يومـي صغيـر ٍ خبرتـه
لا زاد عن حدّه عيوبـه لـك تبيـن !

ما احلى طعم شوق المحب لو صبرتـه
تلقـاه تجديـد ٍ لـدم الشراييـن .. !!

والليل لو مهمـا بطيـت وسهرتـه ..
ترجع تنام وتشتري راحـة العيـن ..

ومهما وثقت بـصاحبك أو ذخرتـه ..
ما يكشف المعدن سوى جور السنين ..

والجرح لو حاولت .. بس ما جبرته ..
يمحيه وقتك تارك ٍ لك أثـر زيـن ..

والهم لو مهمـا نخـرك ونخرتـه ..
تلقى نهاية للحزن لـو بعـد حيـن ..

والخلـد للـي أعبـده واستجرتـه ..
سبحانه اللي قـوّم الحـق بالديـن ..

ولا تنكسر لو مـا بغيتـه خسرتـه ..
ربك له الحكمـة ولعبـاده معيـن ..

واثمـن كـلام ٍ فادنـي واعتبرتـه ..
كلّ البشر والخلق فالكون فانيـن .. !

وإذا هجرني مـن أحـب وهجرتـه ..
بترك هواجيسي مع الخاطر الشيـن ..

وبقـول للدمعـة طريـق وعبرتـه ..
يمكن يكون أحسـن وخيـرة للأثنيـن

مخرج :

إذا ضاع َ النقاء ُ بالعذارى
فلا تبحث بعيدا ً عن حنان ِ

بها كلّ المحاسن ِ قد تجلّت ْ
محاسن ُ وجْهها غير َ الغواني

كأنّ النور ُ فيها والبياض ُ
قمر ٌ متواضع ٌ للأرض ِ داني

وجمّل َ حُسنها خلق ٌ طهور ٌ
وصار َ الوجه ُ مرآة المحاني

لكل من مر كادي