[poem="font="simplified arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يمرّ المنازل خاوية خاطره مكسور = وكبده على ماشاف وجلة وممرورة
بيوت السّعف والطين والمسجد المهجور = مٌُجرد شواهد ماضيٍ أنتها دوره
هنا وجار أبوه اللّي عليه الحطب مسجور = وصفر الدلال اللّي على الجمر منحورة
هنا فيّة أمه مع عفيفات تلك الدّور = جوار النقا مع كل حرّة ومستورة
هنا عرشة الدكان ومشغّل الماطور = يشيخ العطش ماسمعوا الحي ماطوره
هنا صندقة رشدان والكهربة والنور = بعد مايؤذن للعشىَ ينطفي نوره
هنا اول مدارس محو ؛ أميّة الجمهور = ولا ثقفت جمهور والجهل في طوره
هنا منزل الحجّام ؛ في عرفهم دكتور = من الفجر ؛ وامواسه على نار دافوره
شيابين ذاك الحي مرّوه دور بدور = وكنّه يرسّلهم إلى الموت في دورة
هنا ساحة الترحيل اضحت قفر مدثور = ولا عاد ابو سلمان يُسمع لحنتوره
هنا ملعب الصبية هنا صاحب التنور = هنا اول مصوّر في القُرىَ يضبط الصّورة
هنا ملعب الحلوات فلوة ؛ هيا ؛ منّور = حصيصة ؛ عفاري ؛ مزنة ؛ وخزنة ؛ ونورة
هنا زاوية منها ينط الصّبي للسور = ويكشف خصايص بنت بالحيل مغرورة
يطالع جبينٍ ضو نوره صفا بلّور= تعلىَ جمر ؛ وثلوج ؛ وورود منثورة
لها في المرايا شغل ؛ تاقف ؛ تميل ؛ تدور = تُحاكي أمها ؛ "يمه أنا صح أمُوّرة ؟"
يتابع دلعها لين وقّف على المحذور = غدت نبض صدره وانبلاجه وديجوره
وهي ما خفاها شعورها ما علاه شعور = تصيّد دروبه لا طلع يلعب الكورة
حريصة على انها الصبح تُهدي "صباح النور" = وحريصة على تسمع هلا فيك شطّورة
إذا مر باب البيت والعذر صيد طيور = تقول العذر باساعدالجار فطيوره
وَكبروا على ذا بين عصفورة وعصفور = وكلٍ يعرف أن العصافير معذورة
يرسّل عليها شعر مكسور في مجبور = وكان الهدف تعرف لظىَ ثورة شعوره
يهمّه تسمّع ماكتب لوّ ثلاث سطور = لأنه يراها كل ناسه وجمهوره
ولكن صدوف الوقت ما تترك المسرور = تجي له جزاف لين تاقف على زوره
مثل موقف بن العم والحاجر المسعور = تهد الحَلام اللّي من سنين معمورة
وراح الزمان ولا بقى كون حزن صدور= سكنها حنين خادره ضو سعمورة
يعيد الشريط بذاكره فكره المذخور = يحرّض خفوقه من سُباته على الثورة
لوّ أن الدموع تعيد مافات للممرور = بكا في المكان يلين تعشوشب ازهوره
تعرّف كثير ؛ وحب؛ والحب له موفور = ولكن قلبه ماسكن به سوى نورة
[/poem]
لكم
وللعصافير
