السلام عليكم ورحمة الله وبركاته
وبعد ..
عدت من جديد رغم ابتعادي عن جميع المواقع بمافيها وسائل التواصل الإجتماعي ماعدا الواتس ولهذا أرجو المعذره إن حصل أي تقصير مع خالص التحايا والتقدر للجميع
-------------
سبتني خمايل شوق منها الشذا فواح
يثير المشاعر عطرها يالله الجنه

نسايم ربيعيه تداوي كثير جراح
ولو ان جرحي مابعد طاب لو انه

يظللني الرمان والتوت والتفاح
ولامنه اغراني فلا عني وعنه

وللجاذبيه سر مايعرفه لا لاح
سوى اللي يعاني والوله يشتعل منه

وياغصن يامحياح اذا للفرح مفتاح
ترفق بقلبٍ يحمل الهم ويكنه

وسلمني المفتاح واسرج لك المصباح
واسامرك لين الصبح يضحك لنا سنه

واذا دارت الاقداح والنخب في الأقداح
فلاتمزجه لوكان من بارد الشنه

ولكن ماظنيت احد في الهوى مرتاح
لو انه ضحك لك ماقدر يخفي الونه

وجودي على خلٍ تركني صويب وراح
يحسب ان لسهامه على مهجتي منه

وانا اللي جرحني قادر اجرحه دون سلاح
وهو صدق يستاهل ولكني احنه

علي عطيه