شو صايبك تا غبت عنا هيك
حتى لشعرك جاعت الازهار
وزهر الشعر شعرك يا نجدي بيك
طالع ع شبّاك العتم والنار
نجيب سجيم
شو صايبك تتقول اني غبت
وتارك حنين الوقت عالازهار
بتعرف حروف الشعر اني ذبت
ومذوب الكلمات عالزنار
نجدي حاطوم
يا مذوّب حروفك على الزنار
لو غبت بتظلك مع المحبوب
لا تذوّب الكلمة ع خصر النار
عا بعضنا لازم محبة نذوب
نجيب سجيم
ما بذوّب الكلمه ع خصر النار
بيذوب خصر الجمر من كلمه
وبحمل قناديلي فرح بيغار
حتى نشوف الحب بالظلمه
نجدي حاطوم
يا ذايب ويا مذوّب المحبوب
عا وهج جمرة وعا خصر حبقة
كل الحكي المش شعر بدو يذوب
والا كلام الشعر ما بيبقى
نجيب سجيم
الا كلام الشعر ما بيبقى
وزواده الاحلام بدنا نشوف
وكل ما كتبنا حروفنا بترقى
وبتصفق النجمات النا كفوف
نجدي حاطوم
بزوادة الكلمة كتبت حروف
وقلام شعري حملتن سيوفي
وكلما بصلاتي فتحت ديي كفوف
بقرا حياتي سطور بكفوفي
نجيب سجيم
كل ما فتحت القلب عالصفحات
بيركض حنين العمر عرفوفي
بتغفى ع عطر الورد هالنسمات
وبترقص الاهات ع دفوفي
نجدي حاطوم
بستان عمري ودمع عيني ميّ
يا مين فات وشاف بستاني
وفي تحت منهن لون روحي فيّ
من هيك صاروا خضر احزاني
نجيب سجيم
لما بخيالك ظلها بيسهر
بيصير حزنك يشبه الرمان
بتنزل شفاف الحب وبتسكر
وبيضحك الرمان عالصوان
نجدي حاطوم
شوف المطارح بالدني كلاّ
نشربت من دموع الشتي بتخضر
الا الوجوه ال ودّعت اهلا
نشربت من عيونا شتي بتصّفر
نجيب سجيم
الا بعيونك يا سهر ما بنام
في غربة الاحلام ما بتظل
روحي الك يا ورده الايام
بيت الدفا وكل الوفا الما قل
نجدي حاطوم
جبينك سما وقلبك تلج صنين
وشلال روحك للوفا مرايي
شتّي قصايد شعرك الحلوين
بيدفى الحكي وبتزّهر حكايي
نجيب سجيم
يا مين شفلي الحب في الالام
تتظل باقي العمر تتالم
عم تصرخ بحبك بهالاحلام
والروح ما بتصحى تتكلم
نجدي حاطوم
يا مين يهديني عا وهج الشمس
تا ازرعو بشفاف مهووسي
وقلّك انا غياب الشمس عالهمس
شفافي استووا يلّلا تعي بوسي
نجيب سجيم
يا مين ياخذلي وجع هالقلب
ويسكن حنايا روح عينيي
ويبقى مثل ظلي على هالدرب
وان تعب دربي بحملو بديي
نجدي حاطوم
يا مين يهديني على الايام
ومن ورد عمري ياخذ هدية
تا كنت عنك امسح الآلام
واهديك كل العمر يا بيي
نجيب سجيم
يا مين شايف هالزنود السمر
عرقان فيها الوجع ليشفيك
بسال الاهي اللي بايدو العمر
ياخذ عمر مني انا ويعطيك
نجدي حاطوم
يا مين ع تراب الوفا ال ربّاك
ع الارز يحفر عمرك الغالي
مرّات ع بسافر انا ويّاك
ومّرات منسافر انا وحالي
نجيب سجيم
يا مين يسالها عن الايام
الكان فيها الحب مش كلمه
كنا اذا غبنا عن الاحلام
تعاتب سرير النوم بالعتمه
نجدي حاطوم
يا مين قلّك اضحكي حاجي عذاب
وع غياب شاعر خاطرك لا تدمعي
بالشعر بالسهرات بدموع الغياب
روحي معي بتظلّها وانتي معي
نجيب سجيم
يا مين يرجّعني شي ست شهور
لما حنينك بالعشق خذني
وكل ما سكتنا عيونك المنثور
بتصرخ قبل ما ابرد اغمرني
نجدي حاطوم
يا مين يكتبلي بعد شي عمر
خايف عا محبرة الشعر تفضى
عمري متل رّفة جفون السمر
وسرعة سنيني كلّها لحظة
نجيب سجيم
يا مين يسرق لي حلا الاحلام
وبالسر يعطيني ت خبيها
بلكي اذا قصر العمر وبنام
باخذ معي الاحلام لحكيها
نجدي حاطوم
يا مين يزرعني ع صفصافي
جيرانها زهر ونهر عشقان
صاير ع امّو هالعنب غافي
والكرم بنبيذ البكي تعبان
نجيب سجيم
يا مين شعرو بلسم الشّعار
بحروف كلمه بيرسم الصوره
زهّر ربيعو من قبل نوار
وحامل حنينو جناح عصفوره
نجدي حاطوم
يا مين متلك خيّ يهديني
بعطيه كل الشعر والتحنان
حامل بروحك غربة سنيني
ولهفة عواطف اخوتي بلبنان
نجيب سجيم
يا مين شاف النخل جنب القهر
لا بس عبايه صوف تا يدفا
والناس عم تركض ع ضهر الجمر
وبين الوحل والطين عم تغفا
نجدي حاطوم
يا مين شفلي الريح عم تبكي
والغيم يحكي بلهجة المزراب
ومتل الدلع عا صدرها متكي
حضن الربيع بحضن امو شاب
نجيب سجيم
آخر المشاركات
10-31-2009, 11:44 AM
حوار لبناني
العرض العادي
