[ غصب أسافر ]

[ناصر حطاب الدهمشي]

السلام عليكم و رحمة الله و بركاته ..

شهيق :

حاولت أخونك مغرب الأمس لكـن
....................... مرّن عيونك في طريقي و لا خنـت
في غيبتك ما صرت أطيق المساكن
....................... وكل قاع ايدينا زخرفتها بالإسمنـت
صرت ارتحل و اضحك للأيام ما كِن
....................... بي من غيابك روح تسألني إمْن أنت
ماني وفي حتى اسألـي هالأماكـن
....................... كم ليلـة ٍ أضمِّهِـن كنهـن بنـت

[ غصب أسافر ]

ما يهم إن طاح دمعِك مـن جفـاي
....................... المهم إني .. من اعْيونـك مطيـح

وش عليه إن رحت و انت ِ مو معاي
....................... الطريق احيان بالوحـدة .. مريـح

اتركيـنـي ودي أشـعـر إن وراي
....................... فـي مكانـي روح بغيابـي تصيـح

غصب أسافر عن عيونك يا غـلاي
....................... اللقا دايـم مـع اشباهـي شحيـح

ميـر لا جـاك اللقـا بيديـه نـاي
....................... علميه إن له بدينـي عـرق شيـح

كان أخضر يشبه اقلـوب اصدقـاي
....................... صار زي لون الظما أشهـب قبيـح

للوصال اطـراف متحـسّ إبدفـاي
....................... و للفراق أوجيه متْعَـرْف الصحيـح

يا كثر مـ / الوقت يطعن في قفاي
....................... ويا كثر مـ / انفاسي إبصدري تطيح

وين ما يممـت بـي ألقـى عنـاي
....................... في طريقـي ينتظرنـي لـه فحيـح

غربتي مـا عـاد ياسعهـا مـداي
....................... و السنين إتحـد صـدري للضريـح

الخطا ماهو خطاك أنت ِ .. خطـاي
....................... جيـت متعافـي و فارقتـك جريـح

زفير :

من ضفاف الخوف جيتيني حزينة....................
في شفاهك حلم و بْعينك منافـي
ترجفين وْ وجنتك تشبه مدينـة....................
صارت إمن الريح مرتع للسوافي
شاعرك مليان ترحال و غبينـة....................
ابعدي ما عادت ايدينه مرافـي
صدقيني.. صدري اللي تذكرينـه....................
من غيابك ورِّقت عُوجِه تجافـي
حتى وجهي كاتبٍ لك في جبينه....................
إن حضرتي و ان تغيَّبتي ..عوافي

شكرًا لكل من قرأ ..
.
.
ناصر حطاب الدهمشي