اليوم يومك يا وطن ..

[سعد مسهوج]

هذه القصيدة بمناسبة اليوم الوطني لبلادنا العزيزة حفظها الله من كل مكروه






اليوم يومك يا وطن افرح ويا علّه سعيد
.......................في ظل ابو متعب عسى تصبح يخيل خيالها

واجب علينا يا وطن نلبس لك الثوب الجديد
.......................ونرقص لك العرضة فخر يوم العرب بأهوالها

نجدد البيعة وفا لهل الوفا في كل عيد
............................في قولة ابشر سيدي تامر وحنا رجالها

ابطالها حازو لنا بالعز والمجد التليد
.........................وحنا على عز الوطن نمشي بدرب ابطالها

من عهد ابوتركي الى عهدك يابو متعب نعيد
...............................ذروة ولانا وانتمانا .. والبلد بأجيالها

والتنمية تشهد على التطوير من هذا الصعيد
.............................واكبر دليل المملكة تبعث جميع عيالها

بالعلم اسسنا بلد يرمي على الطلع النضيد
..............................لين اعتلا بين الدول بالتقنية منزالها

من فضل ربي ملوكنا بالشرع والرآي السديد
................................محكّمين الانضمة بأقوالها وافعالها

ومن فضل ربي خيرهم ضافي ويوصل للبعيد
..........................ووفير خير بلادنا يسبق وريف ظلالها

من اولويات الملك يحيا المواطن في رغيد
..........................ومن اولويات المواطن ان حيا يحيا لها

لا خير في أمة تبي تنهض ولا معها رصيد
..............................بالعلم لو ان البنوك مكدّسه اموالها

حنا سيولتنا فكر يطمح على بدع الجديد
.......................ويطرح على سوق الدول المملكة واعمالها

عهد ٍ علينا رفعتك بأسم الشعب ايد ٍ بيد
.............................يعلا صهيل خيولها والاهدير جمالها!

وعهد ٍ علينا هيبتك لاثارت بطون الحديد
.....................نفرش لك الدم الخضر حتى اخضرار رمالها

حنا ولانا يا وطن يمشي مع دم الوريد
..........................حنا لها لا عجعجت خيل الرمك حنالها

نوقف بوجه الموت من دونك الى اخر شهيد
..........................وكم فتنةٍ يوم اقبلت اقفت تجر اذيالها

برماحنا وارواحنا وطيورنا ان طارت تصيد
........................وان وقـّـعـت ما وقـّـعـت الا بروس جبالها

مدام عزك عزنا تبشر وحنا ما نحيد
.......................لا قال ابو متعب .. لها خيلي وانا خيالها






اخوكم
سعد مسهوج العلاطي

 

[عبدالله العويمر]

روحُك الوطنيّه مدَائن ُ ولاء
سلِمت يَاسعد
محبّتي

 

[عبدالناصر الأسلمي]

للوطن حق كبير
ومشاعرك ياسعد كبيرة
تحياتي اليك

 

[عبدالإله المالك]

الشاعر/ سعد مسهوج العلاطي

الوطن والشعر والشعراء والقصيدة بالغة النضج ذات رؤية ثاقبة وجزالة

سلمت

 

[فهد الغبين]

الغالي سعد

صح الله لسانك ولاهنت يامبدع


دمت بود

 

[وليد الفالح]

يستحق الوطن ياسعد
شكرا لك

 

[سعد مسهوج]

الرائع عبدالله العويمر

الله يسلمك والله لا يهينك
احترامي

 

[سعد مسهوج]

الاعلامي عبدالناصر الاسلمي

بعد راسي من ذوقك وطيب اصلك والف شكر على نشر القصيدة