رسـائـل لـ لـ يـاسـمـيـنـة

[صالح العرجان]

مـــــــــــــادام.....




مادام عفتي كل حي(ن) على شانـي
روحي فدى روحك اللي لي رهنتيها


حبك بقلبي حـط ساس(ن)وبنيانـي
وورود حبك بالظمايـر زرعتيهـا


ولو حطوا الخفرات في وسط ميزاني
ملتي بهن والجايزة انتـي خذيتيهـا


مالك شبيه ابنات شمـر وظفرانـي
ومطير والويلان مع حرب وعوانيها


ولا مع العتبان وسبيـع وقحطانـي
النفس غيرك ماتبي مـن يداويهـا


ماهو ردى بالبيض خدرات الاعياني
لاشك نفسـي تتبـع اللـي يسليهـا


ولو درت حلاياك في كل الاوطاني
كلا وحشى والله ماني بلاقيها

 

[صالح العرجان]

جيتك بقايا حي كل اكثرة مات
----- وصلت لك با اخر رمق من حياتي


جيتك خوي الخوف في رحلة الذات
----- بين الرجا وظروفي القاسياتي


جيتك من الفرقا كثير التلفات
---- جيت انتحر في نجلك الناعساتي


جيتك مزيج جروح ودموع وأهات
------ نديم لعيون الاسف والشماتي


جيتك شظايا تشتعل شوق بسكات
---- ما ادري حزن مدري سعادة اسكاتي


جيتك لوانتي سابع المستحيلات
---- اللي يحبك يصنع المعجزاتي


جيت استجيرك من شمس المتهات
-----عيت تظللني تحتها عباتي


وابـــ... أتعفى عقب عذاب المعاناة
----- على رصيف اشواقك الدافياتي


تلقفيني من ايدين التشتات
---صيري بحلاة الروح قارب نجاتي


هلى غلا يمحى كدر كل مافات
---- يامزنت افراحي ومنبع هناتي

 

[صالح العرجان]

من ناحية صعبة فهي صعبة بجد
وان جت على حلوه فهي اخر حلاوه

فعلا طويله بس ما هي بـ..هالقد
طول الالف باول حروف الغلاوه

جمرة حشا مقصوصة مجدل اتعد
شقراء على كم خصلة كستناوه

اليا اقبلت لي بعضها في بعضها اشتد
بينه وله لهفة وغيرة وعداوه

وان جت تلفت طاح ضد على ضد
الين يغشى الليل صبح النقاوه

فلجا ثغر.. غنجا حور.. مهملة قد
في عودها اقسى لين والين قساوه

عكفا هدب.. زينة عتب.. زاهبة رد
فيها الهدايه والهدى والهداوه

لاسولفت سمى على انفاسها الند
وكفوفها تمسي الندى بالنداوه

فيها غنج ساذج على ملعنة جد
على شوية شيطنة مع شقاوه

من حدة الفتنه خذت فتنة الحد
تطوي فضا الفتنه بفتن الفضاوه

تستغفل الغفلة تودد ولا تود
تستطيب الطيبه لحد الغباوه

تسرق تفاصيل الصدى لاخر الصد
وتماطل ايام الرخا.. بالرخاوه

مدت لوصلي يد واقصتني بيد
لا ذقت وصل ولا شعرت بجفاوه

راودتها ردت.. ترود.. وترتد
تريد.. تتردد.. تردد.. رداوه

ولني ما احب اصلا اثقل على حد
خذت القصير من الحفا والحفاوه

حلوه وتتغلى ولا جات للجد
عادي تغلى من لها هالحلاوه

 

[صالح العرجان]

أحبك من شتاي اللي تَرَمّد في مواقِيدك
............. وعُمْر ٍ ولّعَت كَفْ الليَالي نَار بِه..واشتَب!


وَ لا أقول الرِّضَا قمّة عَذَابك قَبْل ما ارِيْدك
............ أقول إن الرِّضَا نَهْر ٍ لك بقلبي عَجَز يَنْضَب


عَذَاب ٍ مِنك ما قصّر غَلاك إلا بدا يْزِيدك
............. بعين ٍ قصّرَت في شوف غيْرك..فِيك تِتْعَذّب


هَلا بأشهى ربيع ٍ مِن غصونك لا عَناقِيدك
.........تْقول ان الغصون مِن الخَجَل عنقودها مُعشِب!


لعمْري ماني بْوحدي بنِيرانك بتسهِيدك
................ ولكنّي قدرت أغسل عيونكْ كلها بالحُب


هلابك مَسْهَلين الأرض أرضك..(اعتبر بْيْدك
........... حَنَايَاي النحيلة) يا نَحِيل الخصْر يا مُرعَب


كأنك لا رجعْت أو مَا رجعْت بصمت أغَارِيدك:
......... قميص ٍ في جفن يَعقوب ردّ الشوف بإذن الرب


سكوتك عن سكوتك ما يْشابه دون أنَاشِيدك
........ سوى موت ٍ تَعلّق في فَمك..وشلون لو تسهب؟


أقدّم عذر عن عذري كذيّا ماني بميدك!
......... وأثر مِن يعتذِر من نفسه لنفسه حقيقة : صَبْ!


وأنا شِعري قصيْد ٍ مِن قصيْد ٍ شِعره يْعِيْدك:
................ لقندِيله، لنوره، للخَطَا، للذَنْب، للمُذْنِب !


إذا هاذي قصيدة فالفَضل يَرجع لتنهِيدك
.................أنا مِن عَام أبي أسمع تَنَاهِيدك..أبي أكتب!

 

[صالح العرجان]

يمرك بالي اشهى من كلام ٍ ضيّعوه اثنين
........ وامّرك كني اللي مختنق لاطّرو الاوطان


انا مااخترت احبك لو قدرت آحبك بيومين
....... ولافكّرت من قبل الحنين احبك مْن الآن!


تفضل قلبي اللي في بياضه ضاعوا السارين!
........ وابيك تودي القلب اليباس لهجرة الهتان


انا صرخة عيونك من نعاس يعلّق السقفين
....... على جدار السهر ويطيح بال وينهدم وجدان


بقى من فوقك طاولتْك مناديل وهدب ويدين
....عقب ماغبت ماادري غابت الدنيا ورى الاحزان


هنا عطرك حزين وقلبي البلور والنسرين
........تكسّر وانشرخ حلم ٍ طويل ٍ يشبه الإمكان


ياليتك ترجع اكثر من غيابك وابتعادك لين:
...تكون اقرب من ابعد دمعة ٍ تهرب من الأجفان!


على ميعادنا وقّع فراش وطار عصفورين
..وانا قلبي "غصن"ماله ثمر في شجْرة الحرمان


نواياي الطباشير ان تفتت فالوهم تخمين
..ونواياك الكحْل لاصرت اشوف اني بقايا انسان


هلابك لو غيابك مر لحظة من بعد عامين
...... تراحيبي حضور ٍ في غيابك وانشد النسيان!


اسولف بك علي ولاقدرت اسكت الى هالحين
......جميل انك تسولف وانت تصغي للحديث آذان !


وانا ماكنت اقول انك سكنت عيوني الثنتين
..... مادام انك ورى حدب الضلوع تفتّح البيبان


حبيبي قسمّو قلبي رفاقي وانقسم قسمين
....... وجيت آدوّر اللي يجمعه في سكة الأحزان ..

 

[صالح العرجان]

عسى ليل الغياب اللي نفْضهْ مْن الظلام"اوداج"
..................... يفجّه نور فجر ٍ ليلته تهرب مْن سراجه

وانا قلبي صخر ياللي تْعقْد مْن العتاب حجاج
............... على بال ٍ مثل صبّ البْرد في كاس ميزاجه!

قصيد ٍ مايسّر عيونك النجلا "حبيس ادراج"
.................. وغرام ٍ ماروى ظامي غلاك يجف ثجاجه

غرامك باب واحلامي سجينه والرجا مزلاج
................... مفاتيحه تناهيد الدموع وصبري افراجه !

انا مُتعب من ايام الألم .. واشعر ببعض احراج
............. لو ان اعصابي :النار .. وأحاسيسي ف ثلاجه

خذ الثاير من احزان المواني ..صدري الامواج
............... بدى تحت الضلوع العوج بحر ٍ سرمد امواجه

انا محتاج لكْ ..مااحتاج لي! شف حاجة المحتاج
................. عجز يحتاج جرح ٍ من يدينك كان محتاجه!

ولج ماضيك بين سنيني السود وغيابك فاج
.............. مثل عطر ٍ "سكْت "في فوحته والريح هراجه!

نضب شوفي وانا ادوّر عليك وللزحام افواج
............ تعال الباقي مْن الشوف : رمش ٍ ضيّع حجاجه


نبت لكْ من على اوراقي حمام وطارت الادراج
................ ورحت اطارد ابيات القصيد ف ليل معراجه !

 

[صالح العرجان]

دخلت زحمة مشاعرك الرمادية
........... غادي! وقلبك عن الحب النقي غادي !

أكبرتك أكثر من مصافحك بيديه
........... لو مالي ان جيت اصافحك يّدّك آيادي

خذني من اقصاي حب وبعض حنيّة
............. الحب كلمة عظيمة تسكن فؤادي

ليلة مْا شفتك بها من جد عاديّة
........... وشعر ٍ مايْرسم عيونك فالورق ع ادي!

 

[صالح العرجان]

أخرج من القلب وارجع لي بعد بكرة
.................. اليوم ماني ف حاجة شوفة عيونك

خذ معك نبض الحنين ودمعه وسُكره
................. وشي ٍ يشابه جنون ٍ يشبه جنونك !

يومين تكفي حزين القلب تفتكره
.................. من بعدها ارجع لو انك ترجع بدونك !

ياللي غيابك عن الغيّاب تحتكره
.................. انا لو اني نسيتك كني آخونك !

بديت اخافك يامستهتر على فكرة! :
................. غيري محبين من رمشك يخافونك

من يوم حبيتك أكثر عاجز ٍ لا اكره
................. والكره من "حُب" لا ابطى جاب مكنونك!

و النادر اللي يذوق السجن في وكره
................. حريته معك لو ماهوب مسجونك!

لاتشكر اللي يقدّم للولي شكره
................. مااخترت احبك .. عشان تقول مجنونك!

غب من حناياي وارجع لي بعد بكرة
................. اليوم ابا اكتب قصيدة حب ف عيونك !