للذكريات .. ابعاد

[عون القحطاني]

عشتك مع الاحلام صبح و عصافير
و شمسٍ عليها الغيم .. ذاب و تهتّك
.
وسقت المطر ياحب . ضيف ومسايير
ومنّيت بك قوس القزح يوم شفتّك
.
لين ازهرت .. قفر الاماني .. نواوير
وفاض الشعر .. عذبٍ مثل ما وعدتّك
.
وغنّيت لك .. بين الزهر .. و النوافير
وجنّ الوتر .. من لهفتي .. لا عزفتّك
.
و عتّقت عطرك .. لين ذابت قوارير
وذابت حنايا شاعرك .. ما سكبتك
.
قم ضمني .. يا طيف سيد الغنادير
قم ضمني .. لا تلومني .. يوم ذبتك
.
عشتك مع الاحلام ..صبح و عصافير
وصوت المنبه ..يقطع الحلم تك تك

 

[عون القحطاني]

الله .... خلق روحك ل روحي
شوقٍ .. يعطررررر شراييني
.
وشلون ما انسى بك جروحي
وانفاسك .... ان مت تحييني

 

[عون القحطاني]

الله عليها .... حسنها فارق
لو تلتفت .. للشمس ضمّتها

صبحٍ بدا من خدها شارق
وليل الجدايل ... كيف لمّتها

عنق الغزال و عودها وارق
فاحت وروده .. يوم شمّتها

 

[عون القحطاني]

انتي شكيتي من وجع ثقل الايام
وانا شكيت الوقت .... عجلٍ عليه

انتي تبين الوقت يمشي ل قدّام
وانا اتمنى ... ترجع الشمس حيه

 

[عون القحطاني]

القصيده .. عنيده
و الشعر .. تلّ قلبه

كن هالقلب ف ايده
ع الورق لا كتب به

شاعرٍ من .. وريده
عذْب حرفه يصبّه

لين تروى القصيده
ب الغلا . . والمحبه

 

[عون القحطاني]

.

وانت تدري .. ان روحي في يديك
سيدي .. بالله قلي . . كيف انام

انتظرت الصبح .. بشكي له عليك
كيف تصلبني على صدر الظلام

ما تخاف الشوق .. مثلي يبتليك
وتنسج من الشوق عذبات الكلام

وتنتظرني .. طول ليلك لين اجيك
والحنين .. يطيّر اسراب الحمام

و اتّلفّت . . خايف اني م اهتديك
ولا اجيك .. ولا يجيك .. الا الملام

وقتها و الصبح .. واقف يحتريك
تشتكي له سيدي .... قيد الظلام

 

[عون القحطاني]

‎كل الصباحات .. عذبه
‎من روحها يشرق الحب

‎يذوب قلبي .. و اصبه
‎وعروقها تقول لي صب

‎امن الغلا .... والمحبه
‎ما ينبت الورد والعشب

 

[عون القحطاني]

لي صاحبٍ كنه القمر .. لا تجلّى
مغرور ما احدٍ يشبهه في صفاته

كل ما دنوا العشاق .. منّه تعلّى
و ضفّ النجوم اللامعه في عباته