محاولات شعريّة

[محمد أبوالروس]

احرقتني بـ مفارقك ولا ترق
واعجبك شكل النار فيني بـ ازدياد

ماعاد فيني جُزء باقي ما احترق
إلحق علي ياشين لا اصبح رماد

 

[محمد أبوالروس]

يا حزن لو تحشم عريبين الأنساب
ما كان ذا حالي ولا فيه فرقا

ارقى سما قدام عينك ولا أهاب
وتدق خشمي بالنهاية وترقا

 

[محمد أبوالروس]

هذي هي الحزة وهذا هو الوقت
لا قامت همومي علي اتزارق

ياصاحبي لا تضيق ان شفتني ضقت
الليل يعني " موت " للي مفارق

 

[محمد أبوالروس]

لا يزعجك حالي يا يمة وتضيقين
ما ينفع بجرحي مطوّع ولا طب

الله يعديها على خير واتزين
ذا حال من فارق عقب حالة الحب

 

[محمد أبوالروس]

سياسي وناقد وشاعر وصعلوك
تجمعن فيني،، وانا ما اتجمع

في مجتمع كله دبابيس وشبوك
ان جبت له طاري الحكومة تروّع

 

[محمد أبوالروس]

يا راعي الريتويت رتوت هالأبيات
يمكن مع الريتويت توصل لـ خلي

أبو ملامح فارسيّة وشامات
عساه يقراهن ويبطّل تغلي

 

[محمد أبوالروس]

ياخي ترا مليت شوقي وحنيني
ومليت من ظلم الغياب وظلامه

ان كان ودك بالأجر لد فيني
عوّد وأجرك أجر كافل يتامى

 

[محمد أبوالروس]

نامي وانتي واثقة يا بنيّه
ماغيّرتني احداثي اليوميّة

ولا يطري فـ بالج بأن محمد
ممكن يخفف من غلاج شويّة

واللي حصل واضح وشوفة عينج
تقدير لأجل ظروفج القهريّة

ماهو زعل ولا خيانة ولا
اي حاجةٍ او فكرةٍ سلبيّة

انتي محمد يا خلف جدانه
وانتي الانيقة الناعمة السحريّة

انتي "منى"ويكفيج انج "انتي"
يوم ان غيرج ما لقت شخصيّة

انتي خيال الشاعر المتمكن
وانتي جمال ابياته الشعريّة

وانتي صفا جوه وياملهمته
غلاج يكفي الكورة الارضيّة

*انتي وكم انتي جملية طلة
ياحاضر محمد ويا ماضيّة

وانا مواليدي سنة معرفتج
وانتي اساس احلامي الورديّة