أجنحة وأغاني

[مشعل فايح]

من غرفة الحزن بطلع وأقفل الغرفة
للعالم الناي.. ويا العود والعازف
ما يخالف اصبر على الأوتار بالشرفة
وان قصّوا اصابعي يا نور.. ما يخالف
لو يعرف الاطلسي يا نور ما اعرفه
يصبح به الدر والمرجان به تالف
ما بالوهم حزن.. ولا بالفرح طرفة
ما دمت حيّ بقلب من زمن سالف
ابوس عينٍ ما هي وقت الوهن ذرفه
قصي جناحي عشان آهيد وآوالف
نرحل بعيد ونقول نفارق الغرفة
وبكل ركن نمرّه... نايٍ وعازف.

 

[مشعل فايح]

عينٍ تقول... لا نفترق..
وعينٍ تقول.. لا نلتقي..

يا باقي الذكرى طويلة رحلتي..
ودربي سراب..
دربي سراب.. يا طفلتي..

يا حلوتي ما علموني للبقا..
شـ اللي بقي..
ولا خبروني عن مواعيد اللقا.
الا الليال..
واقصى المحال اني اعيشك للحنين
مابه سنين كل السنين حظ الغياب.

عينٍ تقول.. بابا كفى
وعينٍ تقول.. درب الجفا..

ويا اطهر الأحباب نامي..
واسمعي أحلى القصص
واذا كبرتي عن كلامي
شوقي مثل حلمي خلص..
هشي عصافير الحديقة..
وافتحي باب القفص.

عينٍ تقول... بابا حرام..
وعينٍ تقول.. انت الملام..

ويا روح ابوك الحب تاه
راح وخذا عمري معاه..
بيدي ورق كل المسافات البعاد.
وصدري الخطايا والعناد.
وانتي بعد..
اخر عناقيد المواجع والأرق..
ما كنت اعرف ان البحر يعني الغرق.
ولو دريت.. ما لك احد.

عينٍ تقول... مالك عذر.
وعينٍ تقول.. عشتك سفر

ويا اصغر اخطائي كبرنا والعتاب
كل الوجيه الماضية
كل الصحاب..
قولي له ان الحلم ما يكمل ابد
وان الفرح مثل الغريب..
ماله بلد..
واني بكيت.. من قبل هالدنيا
وتعودت الانين..
واني حنين.. من صرختي الأولى
الين الحين.. الين الحين..

عينٍ تقول.. لا نفترق..
وعينٍ تقول.. لا نلتقي.
لا ما بقي لا مابقي.. غير الأنين.
وأشياء تتحدى السنين..
طول السنين.

 

[مشعل فايح]

قل للمسافر وان مشى : يا مسافر
للأكرم المنان راضي وممنون
شالت ضعونٍ بيض.. والمسك غادر
وتفتق من الصخر ملحٍ بلا لون
عن سبعة ابريل ان سألنا المقابر
يا من يجيب العلم من سدرة الكون
اللي ترك شاي المسايير خادر
والهيل بالصفر على الجمر مركون
قم يا مناور.. يامناور!.. مناور!!
ولابه سوى ما خلت الروح بردون
وكم داعي باكي وكم قلب صابر
وكم صيحة خرسا تبدّا على جفون
قصوا محانينا وخوذوا دفاتر
حبرٍ من النجوى لأبو قلب مطعون
يارب.. يا محير البحر للبواخر
يا مسيّر الأكوان ومكين ما يكون
يا معسّر الهيّن مهين المعاسر
يا معاقب اللونين وملون اللون
ياواسع الرحمة طويل المناذر
يا سامع الدعوة من اعماق محزون
في رحلته لك.. جنّبه هالمخاطر
يا المؤمن بأمرك تنجيه وتصون
يشفع لسبعينٍ ويشهد منابر
وبصحبة نبيك يقضي العهد مرهون
وقل للمسافر لا رحل: يا مسافر
عوّد لربك وانت راضي وممنون

 

[مشعل فايح]

ما تعودت انكر الما ولا اخون الرغيف
ولا تعودت اشرب من المودين الزلال
ولانبت عظمي من السحت والنحت الضعيف
ولا ربيت بكنف فرعون يا بنت الحلال
آدميٍ يعرف الغرب والدرب المخيف
كثر ما سارت به أقدامه دروبٍ طوال
من عيونك شفت ماضي وبالحد الرهيف
أنقتل مستقبل وضاع حلم وشان حال
تعشقيني طيب أشلون بالعهد الشريف
تكذبين بكل جرأة على اول سؤال
والله أني لولا هالما واصلي والرغيف
ما تكلفت المشاعر وطولت الحبال

 

[مشعل فايح]

ارواح تتسلل من الشباك
تدفي جوانحنا وتحيينا
مرّ العمر من دونها إرباك
وامواج نقصيها وتقصينا
هاتي يدك يا روح من ناداك
ساعة لقا.. حلمٍ لأيدينا
لا ينكسر مركب / تذوب افلاك
ونتوه عن أجمل مراسينا
طال العمر.. والباب والشباك
تفتح على بحرٍ بلا مينا.

 

[مشعل فايح]

لو هي بيدّي ما شكت روحك الهمّ
ولو هي بكيفي ما تركتك تعاني
بعيد انا.. غيمٍ سواد ترادم
على المغيب وغيّبته المواني
اللي خذاني منّك اكبر وأعظم
لمني.. ولكن لا تبرّي زماني
تحتاج لي.!! يا علّني فدوتك سمّ
لو كان فيني خير نبضك لقاني
غيمٍ خذاه الغرب بالليل الأظلم
تالي هزيمه ما يبلّ السواني
لو في يديني .. ما بكى ابن آدم
ولا بنت حوّا بالوسيعة تعاني

 

[مشعل فايح]

لا تسأل المنحور وش فيه.. وش فيه.!!
يزفر بقايا روحه اللي بقت به
من لوعة السكين.. والبرد.. والتيه
مرت به ايام الشقا اللي شقت به
يا ما صرخ.. محد سواك انت يوحيه
ومديت له كفك عمر.. وعلقت به
وفجأة.. يطيح من السما للسما.. ليه
ويدّه ما غيرك بالحياة وثقت به.!
لا تسأل اللي مات.. لا مات وش فيه
ملت حياته هالجسد... ما بقت به

 

[مشعل فايح]

هلا بك.. او هلا بأقصى تعب جابك لحد الدار
هلا بك.. او هلا بأسعد حظوظي يوم مريتي
شعرتي بالتعب هذا الذي دك الضلوع اعصار
امانة يا بعد صمت الوجيه المبطية .. جيتي!!
وافزّ.. من اكذب احلام العمر بيدي ركام اعمار
افوح بصورة امي.. وتركي.. وحنونة.. وبيتي.