تعبنا نخاف !
تعالي نزيّن الليلة ..
كلام النور
في ضحكات المسا الهادي ..
بـ همسٍ يشبه أصوات الحفيف بلهجة الصفصاف ..
تعبنا نخاف
تعبنا نساوم الوصل البليد بلعبة الحيله..
ورغم هذا بـ أغني له !!
في روحي شعر وثّاب
وبروحك نغم نجدي ..
ومن وجدي
طرق باب الفرح قلبي ..
أمانة لاتردينه !!
ينادي
قلبك الماطر ضماه وباقي سنينه :
أمانة لاتعنينه !
تعالي نزين الليله
وطن أخضر
نطير للكلام أسراب.. شعر وأنتِ تغنّينه !!
مدينة ليلة عيونك
وأنوار المدينة صوتك .. إحساسك
وهمسك لو هو يتناثر
يسيح الخاطر الزعلان
ويتمدد ..
مرابع حب
مرابع شوق
مرابع تنفي الحاسد وتحضن شهقة الولهان !
وأنا الهيمان ..
أتوه بشارع أهدابك
ويوّصلني لـ لوحه أنكتب فيها :
[ بعد مدة مسافة حلم بتوصلها ] .!
وأواصل رحلة عيونك
وشارع ينتهي بشارع
حنين الوصل بي فارع
و أغني للمطر جرحي :
بشوفك وأرمي الدنيا ورا ظهري عساي أرتاح
....................تعبت من الأفا والـ ليه , ثمين العمر وش باقي ؟!
خسرت ولا ربحت إلا قليل من الصبر وجراح
................... ربحتك وإن خسرت العمر عسى تحييني أوراقي
أمانة يالأماني بس يبس غصن الوفا ماطاح
...................عزيزٍ ماثنته الريح نذر عمره لعشاقي
جميلك يالأمل بالله كبيرٍ والصبر مفتاح
................... لأبواب الفرج.. للصبح.. ألا يالذة اعتاقي
بشوفك وأنحر هموم المسافه وأطوي اللي راح
................... وأجنّب كل متاهات المدينة وأسكن آفاقي
أحس بصدري الواسع : أغاني, رفرفات جناح
................... شراع يبحر بيمك , ويمك هبّت أشواقي
وإذا .. لو عجّل الليل الطويل وعزم المرواح
................... يروح ونسهر بغيره .. مادام بعمرنا باقي
تحيه يالزمان العذب , تحيه والعمر مسباح
................... على حد العطش والتيه.. لقيت المِدْرك الساقي !!
ماعلينا ياحبيبي ماعلينا
من كلام الناس ماكنا درينا !!
لو يقولوا عننا مهما يقولوا:
انتهينا
لا
أبد حنا ابتدينا ..!
و أواصل رحلة عيونك
وأنا في غمرة هيامي
ترامى ضحكي بكل الزوايا ..
والصدى يرقص على الجدران !!
يكّتبنا .. ينادينا بأسامينا
وشبابيك المباني حضن
لـ يعشعش الحمام ونام
نام
نام الهم
نام الحلم
نام الكذب !
بألوّن كل خيالاتي بلون العشب
بلون الأزرق المغرور !!!
وأردّد لك :
قرّب مادامه حادي الشوق لاويك
................... لك بإنتصاب الجرح يا دمي حقوق
منهو يماري طلتك وأنت حاليك
................... رمشٍ خطاه الكحل , والعنق منتوق
منهو يعرفك زين صعب يخليك
...................دام الشجر عزه وراء ظل وعروق
علّه تطول السالفة وأرتحل فيك
................... من أخمص الأقدام إلى ضحكة الموق
يامشرق الأفراح , حظ الشبابيك :
................... إنك تنوّر غرفتك تصبح شروق
ياما رميت من العتب بين أياديك
................... وأسبلت حلمك سيد الهمس برفوق
يا وسع صدرك صاحبي كل مـ أجيك
...................من صدر ضايق ينشرح بال ويفوق
بأقرب مادامه حدني شوق وآجيك
...................والله يعينك كل ماحدني شوق !!
تعالي نزيّن الليله
لذكرى أيام بتجينا ..
ياإنا نصير بالماضي
ياإنا نركب الصعب العنيد ونلحق الحاضر
بأصدق حلم يحملنا
ويحمّلنا أمانينا ..!
تعالي نزيّن الليله
أبرجع طفل
يتمتع بكل اليوم
يرمي أمسه فـ أمسه
ويترك باكر لباكر !!
يا إنا نعيشها لحظه
يا إنا نموت ماعشنا هالزمان بكل فرصاته !
وتبعدنا ليالينا
لا لا .. لا. لاا ..
تعالي نزيّن الليله :
زهر
جوري
بريحان الرضا الوافي
بنعناع الكلام العذب
يا أعذب حس ما ينشاف
تعبنا نضيع اللحظه
وتعبنا نخاف
تعبنا نخاف
تعبنا نخاف
http://www.dwaihi.com/poem/23ahmad15.ra
* لـِ : أحمد المطيري