سلسلة صور شعبيه ( بقلمي )

[سعود القويعي]

بشت أبو ركان

ابوراكــان الله يرحمه ويغفر له كان يعيش في وحدتن من القرايا حول الرياض قبل خمسين سنه .. كان اوّل عمره حرفي يخلط الطين بالما والتبن ويناول .. ثمّن صار ( ستاد بناي ) يبني بيوت الطين وخبير بصفّ اللبن والمشاش ( التلييس ) وتكسيراللبن الين يصير جمش وكل اهل القريه يعرفونه .

هذيك الايام كانوا الناس يتشاوفون للعزايم .. الحال بسيطه ويفرحون الى منّه حط واحدن منهم تميمه لمولوده او جاه ضيف من خارج القريه وسوّا له عزيمه وراعية البيت تقسّم تالي الاكل على الجيران .
من عوايدهم ان الشياب المعزومين لازم يلبسون بشوت ( عبايات ) حتى لو انه قديم .. نوع من الوجاهه والوقار وعاده مشوا عليها الناس وماأحد استنكرها او حاول يغيرها

نزل عند ابو محمد راعي النخل ضيف هادفن عليه من ديرتن بعيده .. وذبح له ابو محمد ذبيحه وعزم ربع المسيد كلهم عقب صلاة الاخير ( العشا ) ..

صلّوا الربع وتجمّعوا عند باب المسجد عشان يمشون جماعه .. وماقطعهم الا ابوراكان عقب ماصلى راح يجيب بشته من البيت لكنه يوم لبسه وقعد يدور به في الحجرة على نور السراج ويسأل مرته وش رايك يانوير.. هو زين .. يواجه ؟
قالت ام راكان وهي تمطّ براطمها : زريه منقوض واسفله منشقّ ..

ـــ عاد وش اسوّى ماهنا غيره .. ايه الناس ليل ومحد منتبه والى منّه جا العيد انشالله دخلت الرياض وشريت لي واحدن ثاني .. يالله ودعناك الله ...... الربع يحترونّي .

الحقيقه ان ابو راكان يجيه مداخيلن حليوه من مهنته لكن وش يسوّى ماجت به غدت به ... عنده اثنعشر بزر وامّه المحروله وأخته المشفوحه ( ميثا ) وعيالها ماكلتن مرزقه دايم وهي عندهم كن ماعندها بيت .. فكّر مرّه يلاغيها على كثر الجيّات وتركها لرجلها و... ورا بيتها مايبزاها لكن هوّن .. لاتقطع وجهه عند الناس اطول مافيها لسانها .

لبس بشته وطلع .. اوّل ماأقبل على الجماعه .. تلقّاه ( تفق ) : ابطيت علينا يارجال .. انهج عطّلتنا .. و ( تفق ) هذا مهوب اسمه الناس مسمينه بهالاسم عشان واحدن من جدّانه كان يبيع السلاح مع ان وجهه مهوب وجه سلاح ولا حتى نبابيط ..

مشوا الربع لبيت ابو محمد وقدامهم الغليّم ( راجح ) ماسكن التريك يسفّر عليهم الدرب ..
وهم يمشون التفت ابو عبد الله على ابو راكان اللي كان يمشي جنبه وقال له : وشذا البشت يابوراكان مالقيت غيره قال ابوراكان والربع ملتفتين عليه : هذا الموجود

ــــ لا مايصلح هالحين الى قربنا لبيتنا ادخل اجيب لك غيره .. عندي بشتن زايد وازين من ذا اللي عليك

ـــ يابن الحلال مهوب لازم هذا يسدّ

ـــ لا ابد انا حلفت .. هو قاعد قاعد البسه الليله والى عوّدنا خذته منك

ـــ تمّ ... شورك وهداية الله

دخل ابو عبد الله وجاب البشت وقعد ينفضه قدام الربع ( شوفوه زين مهوب مثل بشته ) .. فصخ ابو راكان بشته وعطاه ابو عبد الله يحطه عنده الين يعودون ولبس البشت الثاني .. ومشوا .. في الطريق لاحظ ابو عبد الله ان ابو راكان يمشي جنب الجدار التفت عليه وقال : ابو راكان .. وخّر عن الجدار لايحك البشت فيه ويتوصّخ .

بلعها ابو راكان وواصل ممشاه .. ظهروا من سكه ودخلوا الثانيه اللي يتوسّطها منقع مويه عقب المطر اللي نزل من يومين .. عوّد ابو عبد الله يقول : ابو راكان الله يعافيك .. ارفع البشت لايتبلل بالما ؟ حمق ابو راكان لكنه بلعها وسكت

وصلوا بيت ابو محمد وصبوا لهم القهوه .. وشوي وقلّطوا العشا وظهر ابومحمد يقول : تفضلوا الله يحييكم على قلّ الكلافه ... هذي الساعت المباركه .

قعدوا كلهم على صينيتين ابو عبد الله قعد مع مجموعه وابو راكان من قرادته قعد مع الثانيه .. وسموا في الاكل وولدابو محمد واقفن على روسهم بغضارة الما .. ماأمداهم يسمّون الا وابوعبد الله رافعن راسه يدوّر ابو راكان ويقول له : ابو راكان .. ارفع كمّ البشت عن الزفر .. الله يهديك قاعدن بالبشت على الاكل ؟وابو راكان مطمّن ويقول بينه وبين نفسه : وش هالبلشه الله لايعيدك ولا بشتك ..

واحدن من الجماعه اللي سبقهم لبيت ابو محمد كان قاعدن جنب ابو راكان وسأله : وش السالفه .. وش فيه ذا ؟

ـــ يابن الحلال البشت اللي علي له الله لايعقله هو ويّاه ( وعلّمه السالفه كلها )

ـــ عاد مالقيت تاخذ الا بشت هالكريه اللي كنه متمضمضن بعشرق والا ماصّن لوميّــه ! ورا ماعلّمتني وانا اجيب لك بشت. المرّة الجايّه علّمني . وابشر به .

قضت العزيمه وسروا وخذ ابوراكان بشته ابو زري منقوض ومنشقّن اسفله .

عقب شهرين نزل واحدن من الجيران في بيتن ثاني اكبر وازين وحطّ نزاله وعزم الجيران وجو كلهم وابو راكان توّه ظاهرن من المسيد بيروح يجيب بشته المشقوق .. قابله ( مبارك ) لابسن بشت وحاطن على يده واحدن ثاني نادى ابو راكان وعطاهياه وقال له : البسه ولايهمك يارجال .

ـــ الله يجزاك خير .

تجمعوا الربع مثل العادة ومشوا للعزيمه وهم في الطريق التفت مبارك وقال لبوراكان : وراك مبعدن عن الجدار خايفن يتوصخ ... خلّه يحك بكيفه .. حكّه ... حكّه .. ماعندنا الا حلالك .؟

( ابوراكان في سرّه ) : انت اخسّ ووصلوا منقع ما .. غير ذاك المنقع الاول التفت مبارك وقال : ابو راكان لاترفع البشت عن الما... خلّه يخنطل .. بكيفه .. يفداك ؟

( ابو راكان في سرّه ) : هذي والله البلشه .

وصلوا وتقهوو وقلطوا على السماط .. ومبارك كل شوي يرفع راسه ويحاكي ابو راكان قدام الربع كلهم : وراك ترفع كم البشت خايفن عليه من الزفر .. بصره تحدني اقوم هالحين اغطّه بنفسي ..

وابو راكان ضاقت به الارض وعافت نفسه الزاد .. وعزم انه ماعاد ياخذ بشت احد .

العزيمه اللي عقبها مالبس بشت ذا ولا بشت ذاك ... لبس بشته المنقوض زريه والمنشق اسفله ..
وهو يقول : حمارك الضرير ولا موتر الغريب ...

آه .. يازين .. بشت ابو راكان

التاليه ..؟

 

[سعود القويعي]

لحيّــسه

( صوره شعبيه )

لحيّســـه واهلها من سكان حارة منفوحه القديمه ـ الله المستعان ـ ولحيّسه مهوب ذا اسمها ..
اسمها موضي .. او امّيضي و للي يبي يدلعها يناديها مضاوي .. هذي الاسامي اللي ينادونها بها قرايبها وجيرانها .. لكن امها وابوها واختها الكبيره ( عايشه ) ـ الله يهديهم ـ الى بغوا منها شي ولا سوّته والاّ ماصلح لهم تقول امها : لحيّسه وشذا الاكل يالرفلا . والا يقول ابوها : خلّي عنك الهواجيس وقت الطّباخ ياللحيّسه .!
ماترد موضي عليهم لكن اذا حكت عايشه والا قالت شي او عيّرتها ماتخلّيها كل وحدتن تقضب عوشق الثانيه ( الشعر الخشن ) ويتعافرون وامهم تصيح عليهم : هوه انهبلتوا ماتستحون كل وحدتن وش طولها وانتي ياعايشه بزرك تحتك .. اها ........ اعقلوا ...
وامهم صادقه عايشه معرسه وعندها بنت كنها ـ خنفسان قضيض ـ وموضي او لحيّسـه مثل ماينادونها .. تزوجت مرتين وطلّقت .. يقولون انها ماتجيب عيال عشان كذا مسمينها لحيسه وهالأسم كان عيارة خال امها ( مشعان ) اللي مات قبل ثلاثين سنه يوم ام موضي توّها جذعه .... مابعد اعرست .
وسالفة خال امهم انه عاش ومات ارمل مايجيب عيال .. اعرس خمس مرّات ـ يوم كان المهر ريالين وصندوق حديد ـ قبل ما يغلى ويصير اربعة اريل وحمل تمر وطحين .. ولاتقعد الحرمه مع مشعان اكثر من سنه عشانه الى شافها
ماحملت شانت طبايعه وصار حمقي يزعل من اي شي ويطق والى سلّم عليه احدن في السكه مايرد ...
مغير مطمبسن براسه ويهوجس .. ويشّر بيديه.. وساعات يحاكي عمره ..
مشعان عاش عمره .. مالله رزقه ذرّيــه .. وعرفوه الناس ولاعاد احدن عطاه بنته .. ذاك اليوم راح يخطب بنت راعي الحصرات .. اللي تعـذّر منه ان البنت ماتبيه قال مشعان : وش فيني مانيب رجال ماعندي بيت ؟ والا تبون لكم نوخذه .
يوم طقق بكبد الرجال قال له : قم طسّ .. يارجال انت مافيك شي .. كل يومن لك مره انت ماتجيب عيال .. اطلب الله .. قم اسر لبيتك .
لكن مشعان راسه يابس ولاهوب مصدق انه عقيم ــ مافيه شي ـ على قولت راعي الحصرات . ( دغيشم ) اللي مهنته يصلّح الحصر والمهافّ والزبلان .. تلقاه كل يوم مادّن كراعه عند بابه ومدنّـق يحورف فيهالخوص وجنبه طاست .. المــا .. يليّـن بها الخوص اليابس
ومشعان لقى من يزوجه بنته اللي قعدت معه شهرين ثمّـن هجّـت لهلها ؟
قالت لها امها وراك يابنيتي على الرجال . قالت البنيّه : هذا ماينتعاشر يمه على قولت القايل ... حشف وسوء كيل . مايجيب عيال وصبرت عليه لكنه غثيث ماينبغى .
بس يابنيتي تونا خير كان صبرتي .
لكنها عيّت تعوّد .. طلّقها .. وعاش تالي عمره لحاله .. يوم وصل السبعين .. صابه الخرف او شيّن منه ..يظهر من بيته يدور في السكيك واذا شاف بزيرن واقف عند باب اهله طمّن عليه وقعد يحبّبه ويلحسّـــه ! والبزر يصيّـح الين تظهر امه وتجرّه من بين يديه .. وصاروا البزران اذا شافوه مقبلن عليهم انحاشو .!
وسمّوه اهل الحاره مشعان اللحيس .. .. وهذا حاله الين الله اخذ امانته .
ويوم ابطت موضي ماتجيب عيال ذكرت امها عيارة خالها ونشبتها في بنتها .وعايشه لقتها فرصه تكايد بها اختها .
هاذاك اليوم طقّت بابهم ( ام جميره ) الخطّابه جايبتن لهم معرس لموضي . تقول انه رجالن اجودي وسألتها ام موضي : من يقال لـــه ؟
ــ ...... ..........
ــ هذولا مهمب صلب ؟
ــ لا يابنت الحلال هذوليك غير .
ــ وش يشتغل؟
ــ يشتغل ـ دلاّل ـ في سوق الزّل ( السجاد ) وعنده بيت ملك وما عليه رجالن عاقل حتى الدخان مايشربه .
ــ خليني احاكي ابوها واشوف وش رايه وارد عليك .
تيّسرت الامور واعرست موضي على دلاّل الزّل . وخيّب الله ظن الجميع وحملت عقب سنه من عرسها .. وفرحت البنيّه ولا هيب مصدقه وامها صارت تزين لها من شغلات الحريم .. ـــ شي تلهمه وشي تنقّعه وتشربه ــ الين ارتفع البزر في بطنها ...
امورن يعرفونها العجايز هل الخبره .
وتعاقبت الشهور .. وولدت موضي وجابت ولد عقب زواجاتن فاشله ماشمّت فيها ريحة الحمال .. وشالت عنها تهمة العقم . وفرحت موضي المسيكينه وماشالتها الارض .. وجتها الرفايع من قرايبها وجيرانها .. لكن العياره عيّت تروح ..
الى جات امها حرمتن مسيرتن مادرت عن ولادة موضي .. تقول لها وهي تسلّم عليها :
ابشرك يافلانـــه لحيّســه جابت ولـــد ..


احتروا التاليـــه !